Balak: Paghandom (Kang Ernesto Amatiaga, PSK)

Mar Mañus, Jr.

Basak-Iba, Lapulapu City

ANG mananakod mong mga talidhay

Daw bagting sa mga lingganay sa langit,

Daw awit sa mga manulunda nga mikanay

Sa among dughan kang kansang mga lagingling

Nagbilin og mga salingsing sa among kasingkasing.

Ang panagway mong hinulma sa kaambong

Ug kamatawa nahikulit sa batong bantilis

Sa among panumdoman nga dili gayud matay-og

Sa urakan sa kalimot. Ang dugos sa imong kaayo

Nga giul-og mo kanamo nag-umol sa kalig-on

Sa alpa ug omega nga nagtugtog sa among

Mga paghandom kanimo.

O, kon malukat pa lamang unta sa mga luha

Ang kinabuhi mong gidagit sa kamatayon

Hagbay ka ra unta nga nahibalik

sa among kiliran

Kay wala may puas ang

among pagdanguyngoy...

Walay hunong ang paghilak sa among kasingkasing

Nga gilad-an sa kasakit sa kalit mong pagkahanaw.

Kay dili ka na man gayud namo mabawi,

Ang kahapdos nga among gibati

Sa kahinugon kanimo amo na lamang

Gipahungaw sa mga tudling ning balak.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph