ANG ‘lockdown’ gipatuman na
sa dakbayan sa Sugbo.
Wa nay makagawas nga molupyo
lagpas sa utlanan.
Gikan sa laing dapit wala nay
makasulod nga mga tawo
basig sila gitaptan sa ‘Covid-19’
nga bangis kaayo ug matakdan
ang gi-kwarantina nga katilingban.
Ako nabilanggo sa kaugalingon
kong pinuy-anan. Naminaw sa
taknaan sa bungbong, nag-ihap
sa mga gutling nga mahimong
mga gutlo, nag-ihap sa mga gutlo
nga mahimong mga takna,
nag-ihap sa mga takna nga
mahimong adlaw.
Nagbatyag sa mga adlaw
nga mahimong mga gabii.
Naghandom sa umaabot
nga mga ugma kanus-a malibkas
na ang ‘lockdown’ sa dakbayan
aron ako makagawas na sa bilanggoan.
Aron didto taliwala sa laguna
diin nanglunhaw na ang mga balili
ihalad ko ang hubo kong lawas
sa kinaiyahan ug isinggit sa kalikopan
sa kinatibuk-an kong tingog
ang bag-o kong kagawasan.
“Salamat sa Diyos sa Kahitas-an!”