KANIADTO:
Matag sud-ong ko sa masakiton
Kong amahan manambo ang
Mga luha sa akong mga mata.
Maghimo kinig dalan-dalan
Sa akong mga aping
Maglumbaanay pagdailos
Ug mangapusgay
Sa akong tiilan.
Kaming duha magtigi pagpuga
Sa among mga alimpatakan
Ug ang mga pulong nga
Among mahagdaw
Among gipangtisok sa puting papel.
Ilabi na sa mga gabii nga bisan
Ang hinagsa sa larag nga mga dahon
Nga namuhi sa sanga kay gihuyop
Sa sungogan nga huyuhoy
Amo pang mabati.
Dihay higayon nga gisugdan
Nag hingilin sa kangitngit
Ang kahayag, nagsalimuang
Ang akong amahan.
Miungot na sa kisame
Ang iyang panan-aw.
Daw gikumot ang akong
Kasingkasing.
Migawas ko ug milingkod
Sa nag-igdal nga gamot
Sa patayng punoan sa nangka
nga nagbahirig sa among
Balisbisan.
Karon:
Sa akong paglantaw sa kasadpan
Akong nakita nga ang adlaw
Misawop na.
Unya gikusnit sa kasub-anan
Ang akong kasingkasing
Kay ang akong amahan,
Sama sa adlaw
Misawop na usab!