CHRISTINE F. GODINEZ ORTEGA
(Hubad ni Lamberto G. Ceballos)
Ang imong sinina
maoy usa ka tanaman
sa mga bulak,
maanindot sama sa
imong mga mata nga nagpahiyom
sa kahayag.
Sa hawanang duwaanan nikupot ka sa
mga kadena
sa ‘swing’
ug unya nagduwa ka
daw usa ka kusinera nga
nag-isa og luwag,
nagtuis sa kamot, nagyanguyango
sa ulo, pagsigo
sa oras
duyog sa usa ka huni.
Sultihan ko ikaw
sa matuod:
“Makita ra
nimo imong Papa
ug ang imong gamayng igsuon sa
halayo pa
nga ugma.”
Sa pagkatinuod wala
man gayod sila mobiya kanimo.
Imong Papa buhi diha kanimo kay ang lawas day nitaliwan.
Ayaw paminawa ang
mga dagko kon sila mosulti kanimo:
“Motuo ko niini kon
makita ko kini.”
Pahigdaon ka gihapon
sa imong Papa
sa dili pa matulog,
awitan sa usa ka laylay nga balaanon.
Magduwa kamong duha
pag-usab ubos
sa adlaw.
Ug unya ang mga bulak
sa tanaman sa
imong sinina
mobuklad ug mamuswak dungan kanimo.