CARL MANTUA
Ormoc City, S. Leyte
Dugay na kong
nakat-on
sa timpla
niini,
unsa ang mga lamas
nga kinahanglan,
unsaon paghiwa
ang mga
rekados,
unsa ang mga
sagol nga
gamiton aron
mahimong labing
lamian ug
himalitan
ang linuto.
Sa kadugay na
nakong
pagluto,
nasuhid ko na ang proseso,
ang pag-ukay
hangtod
molapot
ug malamian ang
init nga
sabaw,
kanang makatagbaw sa danghaw,
kanang makahidlaw sa makatilaw.
Apan sa akong
pag-ukay-ukay
sa lamiang linuto
gipangita ko kadtong
usa ka hiwa
sa akong kaugalingon
nga makakaplag
na unta
sa labing
lamian,
kadtong mobusog
sa kagutom
ug moinit sa
katugnaw sa
pag-inusara.