SA NAGMASKARANG kalibutan may buho
apan di ko malili ang kalibutan
ni Jose Rizal. Estatuwa na lamang
siya sa plasa. Ang iyang dagway
gipapilit na lang sa gamayng kaha
sa puspuro. Dibuho na lamang siya
sa anunsiyo sa patigayon ug industriya.
Di ko na siya makita sa aspaltadong
kadalanan diin nagkadaiya ang mga
maskara sa mga bayani.
Nakita ko sila si Batman ug Superman.
Si Spider-man ug si Wonder Woman.
Ikahinabi pa diha sa selpon ug tableta.
Di maihap ang mga bayani sa kompyuter.
Maskulado si Panday. Seksi si Darna.
Kinsa pa may pangitaon sa nagmaskarang
Kalibutan nga may buho?