Sa kaharuhay sa kapanganoran
Adunay tabanog nga naglupad
Taliwala sa malinawong kahapunon.
Kanindot lantawon sa iyang pagsulbong
Daw preskong dahon nga huypon sa hangin
Paingon sa wala ug sa tuo sa wanang.
Ang iyang pagkiaykiay ibabaw sa kahoy
Kanindot sundugon.
Gibira-bira ko ang tugot nga tangsi
Hangtod mitulin ang tabanog kong sapisapi.
Gihangad ko kini apan bisan sa kamalinawon
Sa mga lakang sa akong mga tiil nabitik kini
Sa nahugos ug nabira kong mga pisi.
Ug ako nahagba taliwala sa napagbang laguna.
Samaran akong mitugpo pagbalik sa tabanog
Human isalikway ang kasakit.
Wa ko damha miabot ang naghaguros nga hangin
Giharos ug gikuniskunis ang nipis niining kalawasan.
Ang dugukan nahuyang ug ang taptap nangatastas
Sama sa pagkunis-kunis mo ning akong dughan.
Ang lig-ong mga saad nga imong gibuhian
Dihang lunhaw pa ang mga balili dinhi sa laguna
Dugay nang nangalarag sa kainit sa adlaw.
Sama sa silopin kong tabanog kon mahagtos
Kini adto mahipunta sa laing mga kamot.
Ang kaanindot sa atong panaghigugmaay
Mikulit na ning dughan sa imong panagway.
Apan bisan unsa pa katulin ang atong dagan
Kon managlahi ang gisubay natong mga dalan
(Kay misubay ka sa wala ug ako didto sa tuo)
Dili gyud gihapon mag-abot ang atong kapalaran.