Balak: Talaadlawan sa imong Paghikalimot

CARMELO D. LARIOSA

Panadtaran, San Fernando, Cebu

Gisulat ko sa kahilom ang imong pagpahilayo

Kay maoy akong gusto nga sa matag tikyop

Sa kangitngit suginlan ko ang kilumkilom

Nga ang mga kasakit nga imong gihatag

Ning dughan dili maoy katapusang lakang

Nahabilin. Sila maoy mga dahong lunhaw

Nga buot manghawid sa mga adlaw

Nga imong gipaligid.

Gisulat ko ang damgo nga dili na sab gustong

Mopasunding ning handurawan kay ang tanan

Mong halok nagkaanam na man og kapapas

Ning handurawan kong naglantaw sa unahan

Nagpaabot sa laing pag-abot sa usa ka katahom

Nga wala nimo ikahatag.

Gisulat ko ang panganod nga kaniadto

Kanunayng nagkugos sa kaitom sa dag-om,

Ang mga dahong laya nga buot mamalik

Sa sangang ilang gikapyutan aron pangitaon

Ang putling basahon diin dunay mga pulong

Nga natingob paglitok sa dila human modilaab

Ang buhing pagtuo nga ikaw maoy hinagtok

Sa taknaan nga dili na mobalik.

Gisulat ko ang imong pagpahilayo

Tungod kay ako nasayod nga dili na ikaw

Mobalik. Angkunon ko na lang ang basahon

Nga nagsapupo sa mga dahong nahinugon

Sa tanan mong tunob nga way hulma,

Way matahom nga talan-awon kay ang pagsulat

Ug pagtali ko matag gabii sa imong mga lakang

Nga wala na manumbaling sa akong kalibutan

Nahimong halandumong talaadlawan

Sa mga dahong laya nga akong gipanghapnig

Sulod sa lawak sa akong handumanan.