Niadtong Lunes, Mayo 9, milinya ang mayoriya sa mga Pilipino sa nagkalainlaing tunghaan ug polling centers aron mobotar sa mga nagpapili sa mga posisyon sa 2022 National and Local Elections.
Namatikdan sab nga paspas ang pag-transmit sa mga resulta sa eleksyon kada presinto subay sa “partial ug unofficial” nga talaan nga migawas sa mga balita.
Isip usa ka non-government organization, ang Children’s Legal Bureau (CLB) naglaum nga himuong prayoridad sa mga umaabot nga lider ang interes alang sa mga bata ug kabataan.
Usa sa dakong suliran mao ang pagbangon sa Pilipinas human nasinati ang epekto sa pandemiya sama sa paghatag og igong trabaho, pagpaubos sa presyo sa mga produkto, ug pagpalambo sa ekonomiya sa nasod.
Kining maong mga isyu kon dili masulbad, makaapekto sa matag pamilya nga moresulta unya sa kalisdanan sa mga bata nga nag-agad sa suporta sa ilang mga ginikanan o nagbuhi kanila.
Ikaduhang suliran mao ang pag-edukar sa mga bata ug kabataan.
Bisan pa man nga gisugdan na ang limited face-to-face classes sa pipila ka mga tunghaan, kinahanglang masiguro nga luwas ang mga bata sa ilang pagtungha kon mosulod na sila sa eskwelahan.
Maklaro sab unta kon mahimo na nga direksiyon ang pagpabalik sa onsite classes human nga nasayran nga nagkaubos na ang mga kaso sa Covid-19 sa pipila ka mga buwan.
Kinahanglan sab nga masiguro nga sakto ang learning materials sa mga bata ug mahatagan og kahigayunan ang mga bata nga makat-on og tarong human masayri nga ang Pilipinas usa sa mga nasod kon diin dili kamao mubasa ug masabot ang mga bata.
Ipadayon sab ang rollout sa mga bakuna alang sa mga gustong maprotektahan batok sa Covid-19 aron luwas ang mga bata sa pagtungha.
Labing importante sab nga himuong priority bills ang mga balaudnon nga dunay kalabutan sa pagpanalipod sa mga bata.
Usa niini ang pag-usab sa Anti-Trafficking in Persons Act, ang pagsilot sa online sexual exploitation of children (OSEC), ang paghunong sa corporal punishment, ug uban pang mga balaudnon nga nagtan-aw sa maayong kaugmaon sa mga bata.
Maminaw sab unta ang atong mga lider sa tingog sa kabatan-onan. Gani, dunay gihimo nga Children’s Agenda ang mga batang ningtambong sa usa sa mga kalihukan nga giorganisa sa CLB niadtong Abril nga naglatid sa ilang mga demanda ngadto sa mga nagpapili.
Hagit karon sa matag Pilipino ang pagtan-aw sa matag lihok ug desisiyon sa mga napilian sa nagkalainlaing posisyon aron masusi kon natuman ba ang mga saad sa nagpapili niadtong campaign period.
Abli sab ang CLB sa pakig-partner unya sa mga organisasiyon aron daghan pang mga bata ug kabatan-onan ang mahimong empowered nga morepresentar sa ilang interes sa katilingban.
[Lindog sinuwat ni Atty. King Anthony Perez, usa sa mga abogado sa Children’s Legal Bureau. Mahimo kamo nga mopadangat sa inyong mga suliran o pagsumbong sa kaso sa pagpangabuso pinaagi sa pag-email (clbphilscebu@gmail.com) o pag-send og mensahe sa Facebook Messenger: m.me/ChildrensLegalBureauInc]