Nakabalik na sa Sugbo ang Binibining Pilipinas International 2022 Nicole Borromeo ug usa ka grand homecoming ang gipahigayon kagahapon, Agusto 19, 2022 sa Golden Peak Hotel, dalan Escario, Cebu City.
Miamag ang kaanyag sa Interior Design student sa iyang coral pink nga cut-out gown sul-ob sa iyang korona sa Bb. Pilipinas.
Sa gihimong Q&A sa laing Cebuana beauty queen nga si Maria Gigante, gitug-an ni Nicole nga taodtaod nga mi-‘sink in’ sa iyang kaugalingon nga siya maoy nakakuha sa maong titulo human sa coronation night.
Matod pa niya nga diha na niya na-realized human nga mitawag kaniya ang iyang amahan sa telepono nga mipahalipay sa iyang kadaugan ug gipahinumduman nga pinaagi sa iyang inpluwensiya daghang tawo ang iya unyang matabangan.
WA MANGANDOY
Gitug-an sab ni Nicole nga sukad sa iyang pagkabata wa siya mangandoy nga mamahimong usa ka beauty queen, apan ang pag-pursue sa iyang passion isip usa ka artist pinaagi sa painting.
Napukaw ang iyang interest sa dihang gidasig siya nga mogawas sa iyang comfort zone aron iyang masinate ang uban pang mga butang o kalihokan nga iyang mahimo.
“I used to be afraid of public speaking, to be in front of large audiences... it just shows that there is so much room for growth and to also inspire other people to grow as well,” kalma nga tubag sa dalaga.
DI UNTA MOAPIL
Gipaambit sab niya sa dihang gikuso-kuso ang Sugbo sa Bagyong Odette niadtong Disyembre 2021 nahugno ang iyang plano sa gihimong pagpangandam sa Bb. Pilipinas pageant.
‘Devastating’ ang paghulagway ni Nicole human sa maong bagyo hinungdan nawala ang iyang interest nga mosalmot.
Apan usa ang iyang pamilya nga nagdasig kaniya nga ipadayon ang iyang tinguha ilabi nga nga gipasaligan siya nga suportahan taliwala sa kalamidad nga ilang nasinate niadtong higayona.
“Always have courage to do things you think you can’t do because you will never know until you give it a try,” mensahe ni Nicole.
Ang 58th edition sa Bb. Pilipinas gipahigayon sa Smart Araneta Colisuem, Quezon City, Metro Manila niadtong Hulyo 31, 2022.