Ang mosunod mao ang fearless showbiz predictions sa mga inilang manghuhula o mananagna sa kaulohan nga puwedeng matinuod ug puwede sab nga burit lang. Sanglit ang bugtong nasayud ra gyud ang Dios nga Makagagahum sa tanan. Suwerte o dili man ang dala sa Year of the Water Rabbit, ang importante nga naa gihapon ang atong paglaum ug pagsalig Kaniya. Malipayong Bag-ong Tuig!
DILI NA MAAYO?
Ang nakita sa Tarot reader nga si Gloria Escoto, nga gi-share sa YouTube channel ni Romel Chika, nga basin dili na maka-recover si Kris Aquino sa iyang sakit. Apan gipabuhagay sa latest Facebook post ni Ogie Diaz nga niarang-arang na ang health ni Kris.
MAGKASAKIT
Posibleng magkasakit si Cristy Fermin sa 2023. Kini tungod sa nigawas nga “death card” sa manghuhulang si Gloria Escoto. Ang 66-anyos nga talkshow host gitambagan nga mas maayong moretiro na sa showbiz.
ABSUWELTO
Maabsuwelto si Vhong Navarro sa iyang giatubang nga kaso. Apan gipasidan-an ang It’s Showtime host nga magbantay kay posibleng sa lain nga paagi siya panimaslan.
DEPRESSION
Ang prediksyon usab sa psychic reader nga si Rudy Baldwin nga adunay celebrity nga maghikog tungod sa depression ug ubay-ubay sa social media influencers ang mamatay sa disgrasya sa 2023.
KATHNIEL KASLON
Gitagna nga kaslon karong tuiga silang Daniel Padilla ug Kathryn Bernardo nga 11 ka tuig nang uyab. Ang KathNiel ma-busy usab sa reunion movie nila ni Direk Cathy Garcia.
MAG-LIE LOW
Magmalampuson gihapon si Vice Ganda sa iyang career apan mag-lie low ni sa showbiz aron mas tutokan ang lovelife ug ang damgo niyang makabaton na og baby.
ALDEN MOBAHAR
Nakita nga mag-flop ang career ni Alden Richards sa 2023. Ang rason? Dili suwerte ang Kapuso actor sa Year of the Rabbit. Wala say nakitang magka-lovelife na ang Kapuso actor.
MOANGKON NA?
Giingong dako ang purohan nga moangkon na si Coco Martin sa dugay nang nabaniog nilang relasyon ni Julia Montes ug ang chikang duna na silay anak. Dunay kasal nga mahitabo apan dili sa 2023.
MAGBUWAG
Gitagna nga mopauli ra sa break-up ang relasyong Bea Alonzo ug Dominique Roque tungod sa managlahi nilang estado sa kinabuhi. Si Bea mas sikat ug mas adunahan kon itandi sa aktor.
PROBLEMADO
Nakita sa Tarot cards nga dunay nasinating problema si Angel Locsin sa iyang relasyon. Kon tinuod ba ang mga tsismis nga dunay laing babaye ang iyang banang si Neil Arce, ang tubag sa manghuhulang si Gloria Escoto, “Oo, ang sagot ng baraha.”