Sila ang mga OPM legend nga nagpasikat sa daghang OPM love songs nga nahimong soundtrack sa daghang mga kinabuhi. Apan sila mismo naigo sab sa ilang mga kanta. Dili lang sila puros buwag na sa asawa apan ang uban nila kapila na gikasal. Nia ang ilang estorya. (Mga litrato gikan sa Facebook ug Instagram.)
HAJJI ALEJANDRO
Ang orihinal nga “Kilabot ng mga Kolehiyala” unang nakasal sa iyang high school sweetheart nga maoy inahan sa singer nga si Rachel Alejandro. Nakasal sab sila sa beauty queen ug aktres nga si anhing Rio Diaz apan wa sab molungtad. Ang pinakadugay nga nakarelasyon ni Hajji ang “Kahit Gaano Kalaki” singer nga si “Alynna.”
FREDDIE AGUILAR (ug asawang si Jovie)
Unang gikasal si Ka Freddie kang Josephine Queipo niadtong 1978. Duna silay upat ka mga anak nga naglakip ni Maegan Aguilar. Gikasal usab siya sa usa ka Antonette Martinez tuig 2000 ug dayon sa 17-anyos nga si Jovie Albao niadtong 2016 nga maoy iyang asawa karon.
ANTHONY CASTELO
Ang sikat nga balladeer ug gitawag nga “lady killer” niadtong `70s dugay nang buwag sa iyang kapikas nga gikumpirmar sa kolumnistang si Aster Amoyo. Niadtong 2014 nakarelasyon ni Anthony Castelo ang kanhi aktres ug politician nga si Cita Astals apan wala sab magdugay.
REY VALERA
Nabuking nga wala na ang magtiayong Rey Valera ug Ditas Guardiano tungod sa pelikulang “Kahit Maputi Na Ang Buhok Ko” nga naghubit sa lifestory sa OPM icon nga gipasalida sa unang summer Metro Manila Film Festival. Matod pa nilanat og 20 katuig kapin ang ilang kaminyuon.
RICO J. PUNO
Sa taho ni anhing Ricky Lo, ang “Macho Gwapito” singer giingong dunay upat ka mga anak sa iyang ex-wife Doris Tayag ug laing upat sa lainlaing mga babaye. Karelasyon ni Rico ang batan-ong si Queenzle Natividad dihang namatay ni sa heart failure niadtong 2018.
VICTOR WOOD
Si Victor Wood unang gikasal sa usa ka “Lengleng.” Gisundan ni kang Ofelia Mercado Ponce nga gitugahan og duha ka mga anak. Ang iyang ikatulong asawa ginganlan og “Nerissa” nga maoy nakauban sa Jukebox king hangtod na sa iyang kamatayon niadtong 2021 basi sa Wikipedia.
NONOY ZUÑIGA
Gikumpirmar sa veteran balladeer ug hitmaker sa ABS-CBN News nga wala na sila sa iyang asawa nga si Grace Maroket sukad pa niadtong 2016 tungod sa “third party.” Iyang giapas ang iyang asawa sa Amerika aron unta isalbar pa ang ilang kaminyuon apan pakyas ni.
MARCO SISON
Sa interbyu sa kolumnistang si Aster Amoyo, niangkon si Marco Sison nga daghan siyang napasakitang babaye niadto ug nga duna siyay pito ka mga anak sa upat ka mga lainlaing babaye. Samtang gibutyag ni anhing Ricky Lo niadtong 2008 nga dunay upat ka mga anak si Marco sa iyang asawa nga si “Jojo.”
DANNY JAVIER
Hangtod sa kamatayon, nagpabiling pribado ang personal nga kinabuhi ni Danny Javier. Apan may mga espekulasyon nga dugay nang buwag ang OPM icon sa asawa nga si Trina Javier nga maoy inahan sa iyang mga anak. Si Trina apil usab niadto sa “Sang Linggo nAPO Sila.”