Malipayong gihangup sa mga kababayang Filipino ang paghiabot ni Bb. Pilipinas International 2022 Nicole Yance Borromeo sa Japan niadtong Dominggo alang sa 61st Miss International pageant.
Usa sa mga nisugat sa 22-anyos nga beauty queen sa Narita International Airport ang Cebuanang si Juliet Suico-Iwata kinsa duha na ka dekada’ng nagpuyo sa Japan.
“Support ko kay Cebuana baya ug gawas nga pag-umangkon sa akong amiga, schoolmate sila sa akong unico hijo nga si Junichi. Padung na mi Yokohama sa iyang event nga `meet and greet-dinner’ as her journey begins today,” ni Iwata sa iyang private message sa SuperKa! sa Facebook niadtong Dominggo.
Gipaambit usab ni Borromeo sa iyang social media ang mga litrato atol sa iyang departure sa Manila International Airport nga nagsul-ob og pink coat ug skirt samtang bitbit ang bandera sa Pilipinas nga dunay caption, “From a heartwarming send-off to a heartwarming welcome.”
Nadelatar man og 14 ka buwan ang iyang partisipasyon human gikanselar sa Miss International Organization ang kumpetisyon niadtong 2021 tungod sa pandemic, apan si Nicole nisaad nga ihatag ang tanan aron makuha ang ikapitong korona sa Pilipinas sa Miss International-- human nilang Gemma Cruz (1964), Aurora Pijuan (1970), Melanie Marquez (1979), Precious Lara Quigaman (2005), Bea Rose Santiago (2013), ug Kylie Verzosa (2016).
“I can give 100% but the results are not guaranteed. But I’ll go the extra mile to fight for the 7th crown for the Philippines. This is me, take it or leave it,” tipik sa iyang pamahayag atol sa send-off party sa Manila.
Si Nicole nga lumad nga residente sa Barangay Guadalupe sa dakbayan sa Sugbo ug tinun-an sa kursong Interior Design sa University of San Carlos, banggiitan na sa mga pageant competition.
Lakip sa iyang beauty titles ang Miss Silka Cebu 2017, Miss Mandaue 2018 first runner-up, Sinulog Festival Queen 2019, Reyna ng Aliwan 2019, Miss Teen Philippines 2019 second runner-up, ug Eat Bulaga’s Miss Millennial Philippines 2019.
Ang Miss International 2023 coronation night ipahigayon sa Yoyogi National Gymnasium sa Shibuya, Tokyo karong Oktubre 26 diin 73 ka mga nasod ang magtigi nga makita live sa official YouTube channel sa bbpilipinasofficial.
Mahimo mong makatabang aron makasu’d si Nicole sa semi-final round pinaagi sa pageant’s official mobile app nga libreng ma-download sa Google Play Store or Apple App Store, i-click ang “vote” ug pili-a ang “Philippines.”
Ang unang tulo ka mga kandidata sa Asia ug Oceania, Uropa ug Africa, ug Amerika nga dunay kinatas-an og botos ang diretsong maka-advance sa Top 15. Ganbatte Kudasai, Nicole!