Ang nahitabo sa kanhi child star ug singer nga si Aaron Carter maoy pinakabag-ong gitutokan kon lain na ba usab ning drug-related nga kamatayon sa Hollywood. Mao gyud kaha ni ang ilang kultura? Tan-awa ang mga similaridad sa ilang pagkamatay.
Aaron ug Leslie Carter
Sila ang managsuong Aaron ug Leslie Carter, parehong manghod sa Backstreet Boys Nick Carter. Si Leslie nakit-an nga wala nay kinabuhi sa iyang balay niadtong 2012 tungod sa drug overdose sa edad nga 25. Niadtong Sabado nakit-an usab ang patayng lawas ni Aaron sa bathtub sa iyang balay. Wala pay resulta sa toxicology apan wala malilong sa publiko nga dugay nang sud-gawas si Aaron sa rehab ug padayong nakigbisog sa drug addiction.
Whitney Houston
Si Whitney Houston nipanaw sa edad nga 48 niadtong February 2012. Ang iyang lawas nakit-an nga nalumos sa bathtub ug lango sa druga. Paglabay sa tulo katuig mao usab ang nahitabo sa iyang bugtong anak nga nakit-an nga nalumos usab sa bathtub ug lango sa druga. Si Bobbi Kristina Brown namatay sa edad nga 22.
Michael Jackson
Ang King of Pop namatay human ni gihatagan og dakong dosage sa tambal sa iyang doctor alang sa insomnia. Apan daghan ang nagtuo nga ang adiksyon ni Michael sa pain reliever gumikan sa iyang cosmetic surgeries ang nakaingon sa iyang cardiac arrest sa edad nga 50 niadtong 2009.
Elvis Presley
Ang King of Rock n’ Roll nakit-an nga nalup-og sa banyo sa iyang mansion niadtong August 16, 1977. Si Elvis nabugtoan sa edad nga 42 niana sang adlawa. Sa toxicology report nakita ang taas nga level sa `opiates’ o pain relieving drugs nga giingong maoy hinungdan sa iyang cardiac arrest.
Marilyn Monroe
May conspiracy theories nga gipatay si Marilyn Monroe tungod sa pagkahilambigit niya sa managsuong Kennedy. Apan ang movie legend namatay sa overdose sa tambal sa depression ug insomnia niadtong 1962 sa edad nga 36. Si Monroe nakit-an nga hubo ug wala nay kinabuhi nga nagkulob sa iyang katre diin nagkatag ang mga basiyo sa pills samtang nagkupot og telepono.
Prince
Si Prince Rogers Nelson o mas sikat sa pangan nga “Prince” namatay sa accidental drug overdose nga fentanyl sa edad nga 57 niadtong Abril 21, 2016. Ang pagtuo sa singer nga ordinaryo ra nga painkiller ang iyang gitumar nga vicodin apan fentanyl diay. Wala matino kon diin nakuha ni Prince ang maong tambal.
Jimi Hendrix
Usa sa mga most influential ug greatest American guitarist niadtong `60s, si Jimi Hendrix napalgan nga unconscious sa iyang hotel room. Ang hall of famer namatay sa edad nga 27 niadtong 1970 human giingong niyarok og 9 ka sleeping tablets.