Way duda nga nakapadugang karon sa popularidad sa It’s Showtime ang partisipasyon sa mga cute ug bibong chikiting sa “Isip Bata,” ang segment nga konsepto ni Meme Vice Ganda. Basaha kon asa ni sila nadiskubre ug nganong gitawag silang mga ‘child wonder’ sa maong noontime TV show.
“KULOT”
Si Princess Kathrine Caponpon sa tinuod nga pangan mao ang 6 anyos nga batang Batanguenya nga nisikat sa iyang viral video sa miaging tuig nga niabot og 17 million views.
Mao ni dihang giapas niya ang iyang papa nga naa sa imnanan samtang bitbit ang bunal ug gisermonan nga morag dako’ng tawo kay kon dili mopauli ang iyang papa, iyang paw-on ang sampot.
Si “Kulot” unang nigawas isip usa sa mga viral kids sa “Bawal Judgmental” sa Eat Bulaga diin nipresintar pa ang TV host nga si Maja Salvador nga maoy mamahimo niyang talent manager.
Apan niadtong Pebrero karong tuiga, usa si “Kulot” sa mga gipailaila isip mainstay sa bag-ong segment sa It’s Showtime nga “Isip Bata” diin sila gitawag nga mga “Batang Cute Po.”
“ARGUS”
Si Argus Felix Aspiras unang nag-viral sa miaging tuig sa edad nga 4 tungod sa iyang mga super cute nga video sa Tiktok isip “The Tinapay Kid” kauban ang iyang mommy.
Sa unang live episode sa “Isip Bata” niadtong Pebrero, gipabilib dayon ni Argus ang madlang pipol dihang iyang gi-recite ang mga kontinente ug ang tana’ng pangan sa mga presidente sa Pilipinas.
Sa miaging semana, nag-viral ang litrato nila ni Kapuso actor David Licauco nga komento pa sa mga netizen, “para silang mag-ama.”
Ang daddy ni Argus usa ka OFW nga nagtrabaho isip policeman sa South Sudan.
“IMOGEN”
Si Imogen Cantong nadiskubre dihang nag-viral ang iyang kantang “Da Da Da” nga inspired sa tono nga pirmi niyang kantahon sa 2 anyos pa lang siya.
Ang iyang mga ginikanan nga silang Rey ug Kaye Cantong nga parehong vocalists sa “Six Part Invention” (ang resident band sa TV show nga “Everybody, Sing” ni Vice Ganda) maoy nag-composed sa maong kanta.
Ang 6 anyos nga si Imogen mao usab ang nikanta sa themesong sa “Mini Miss U” segment sa It’s Showtime ug usa sa featured singers sa kantang “3-in-1” ni Jamie Rivera.
Apan sukad nagsugod ang klase, panagsa na lang makit-an si Imogen sa “Isip Bata” tungod kay mas prayoridad nila ang iyang edukasyon.
“JAZE”
Si Jaze Kyler Collantes Capili nadiskubre human nag-trending ang iyang mga bibong dance video ug mga acapella nga kanta sa Tiktok.
Ang 6 anyos nga gitawag nga “Batang Coco Martin” ang nidaug sa Little Mr. Pogi Global 2023, lakip na ang Best in Talent ug Batang Bibo.
Si Jaze ang ikatulo sa upat ka mga managsuon nga puros lalaki ug napanglantawan nga maoy mosunod sa tunob nilang Jhong Hilario ug Vhong Navarro.
Sama nilang Imogen, Kulot ug Argus, si Jaze regular usab moadto og eskuwelahan sanglit katulo ra sa usa ka semana ang “Isip Bata” sa It’s Showtime!