Subay sa anibersaryo sa Martial Law karong adlawa nga gideklarar niadtong Sept. 21, 1972, atong balikan ang mga pakigbisog ug pagpanglupig nga nasinati sa mga celebrity ning maong mapintas nga panahon sa atong kasaysayan.” / MGA LITRATO GIKAN SA INSTAGRAM, FACEBOOK
RICKY LEE
Dihang gipaubos ang nasod sa Balaod Militar, lakip sa gipadakup sa diktaduryang Marcos ang mga magsusulat ug naa sa akademya nga kontra sa iyang kagamhanan. Basi sa hrvvmemcom. com.ph, si Lee ug kaubanan gibalhug sa Fort Bonifacio diin siya nagkasakit ug nisuway og hikog sa tumang kaguol. Si Lee gipasidunggan sa miaging tuig isip National Artist.
NELIA SANCHO
Si Sancho mao ang 1st runner-up ni Gloria Diaz sa Bb. Pilipinas 1969. Siya usab ang 1971 Queen of Pacific ug Most Photogenic sa Australia. Apan mas gipili niining mag-aktibista batok sa mga Marcos ug nahimong political prisoner gikan sa 1976 hangtod 1978. Siya ang founder sa Gabriela ug unang mga lider sa human rights group. Namatay ni sa edad nga 71 sa miaging tuig.
KIM ATIENZA
Sa iyang Twitter account niadtong 2020, usa ka newspaper clip ang gi-post ni “Kuya Kim.” Mao ni dihang gikulata siya sud sa banyo sa upat ka mga sundalong Marcos loyalists ug pugos nga gipaangkon nga usa siya ka komunista atol sa napakyas nga coup d’ etat sa Manila Hotel niadtong 1986.
CARLA ABELLANA
Gipabuhagay sa aktres nga biktima usab ang iyang pamilya sa Martial Law. “Our grandfather was detained because the Marcoses wanted our 25-hectare property in Sta. Ana all to themselves,” ni Carla sa iyang Instagram post. Dugang niya, suwerte lang nga nakagawas pang buhi ang ilang lolo.
NONOY ZUNIGA
Niadtong Oktubre 4, 1980 adunay niboto’ng bomba sa kasilyas sa Siete Pecados Bar sa Westin Philippine Plaza Hotel diin usa sa mga grabeng nasamdan ang singer nga si Nonoy Zuñiga hinungdan nga giputol ang tuo niyang paa. Ang maong insidente usa lang sa sunodsunod nga mga pagpamomba.
JOEL LAMANGAN
Si Direk Lamangan napriso tungod sa iyang pagka-student activist ug paghimo og mga dula nga naglarawan sa mga kahiwian sa kagamhanan. Una siyang gibalhog niadtong 1973 ug dayon pagka-1977 diin siya gi-torture.
JO ANN MAGLIPON
Ang editor-in-chief karon sa Philippine Entertainment Portal (Pep) gipadakop pipila ka oras sa wala pa ang iyang ika-24 nga kasumaran. “I was arrested and held incommunicado for eight days, and my 24th year I celebrated among women prisoners, some of whom would be dead in a few years,” balik-lantaw niya nga nakutlo sa Pep.ph.
LINO BROCKA
Ang legendary director ang nailang “one of most influential filmmakers of all time” kansang mga pelikula nagsalamin sa kahimtang sa mga Filipino sa rehimeng Marcos. Niadtong 1985 giaresto si Brocka nga walay piyansa tungod lang sa partisipasyon niini sa jeepney strike.