Basi sa Philippine Statistics Authority ang sakit sa kasingkasing ang nag-unang hinungdan sa kamatayon sa mga Pinoy. Tan-awa kon kinsa sa showbiz ang milagrong nakalingkawas sa heart attack o stroke ug unsay mga paagi aron malikayan ang maong sakit. / Mga litrato gikan sa Instagram GARDO VERSOZA Niadtong Marso 28 gipaubos sa angioplasty ang aktor human ni giataki sa kasingkasing. Ang angioplasty mao ang paghinlo sa nakabara sa ugat aron makadagan ang dugo. Gibasol sa iyang asawang si Ivy ang sobrang physical activity ni Gardo sama sa biking, workout ug pagkahinayaw sa Tiktok. Ang pamilya ni Gardo may history na sa heart attack. ELY BUENDIA Giataki sa kasingkasing ang ex-Eraserheads vocalist niadtong 2007 diin katulo ni gipaubos sa angioplasty. Kaduha sa Philippine Heart Center ug ang ikatulo pagkasunod tuig. Gibasul ni Ely ang sobrang trabaho, walay ehersisyo ug pagkahilig niya sa mga mantikaong pagkaon. Kaliwat sab sa ilang pamilya ang cardiovascular disease. KIM ATIENZA Gioperahan ang kasingkasing ni Kuya Kim human ni na-stroke niadtong 2010 diin gitapakan og metal ang lungag sa iyang kasingkasing nga susama sa gidak-on sa P5 coin. Dinhi gi-career ni Kuya Kim ang pag-ehersisyo isip tipik sa iyang therapy sama sa workout, running, cycling ug swimming ubos sa paggiya sa iyang doktor. GARY V. Niadtong 2018 gipaubos sa open-heart surgery ang “Mr. Pure Energy” tungod sa pagpanakit ug paghuot sa iyang dughan. Nasuta nga dunay nakabara sa walang ugat sa iyang kasingkasing tungod sa diabetis nga iyang giantos sukad pa sa edad nga 14. Bisan sa iyang kundisyon nagpabiling himsog ug aktibo ang singer nga gihulagway sa showbiz nga dakong milagro. SUSHMITA SEN Ang Miss Universe 1994 (nga gipahigayon niadto sa Pilipinas) nibutyag sa iyang Instagram live nga giataki siya sa kasingkasing niadtong Marso lang ug gipaubos sa angioplasty. “I survived a massive heart attack with 95% blockage because of my active lifestyle.” Tambag sa 47-anyos nga beauty queen sa India nga dapat regular magpa-check-up ug dili magpalabi sa stress sa trabaho. BOOBAY Ang Kapuso comedian kalit moblanko ang hunahuna sama sa nahitabo dihang giinterbyu siya live ni Boy Abunda sa Fast Talk sa GMA. Matod ni Boobay nga epekto pa ni sa nahitabong stroke niya niadtong 2016 nga iyang gibasul sa iyang pagka-workaholic. Mao karon mogahin na gyud siyag adlaw aron makapahuway. NELSON ASAYTONO Bisan ang mga PBA legend dili exempted sa maong sakit. Si Nelson Asaytono giataki sa kasingkasing niadtong 2020 ug Samboy Lim nga nakuyapan sa exhibition game niadtong 2014 tungod sa cardiac arrest. Basi sa Mayoclinic.org, ang CPR makatabang og dako sa mga emerhensiya nga ingon niini.