Ilailaha ang mga celebrity ug ang ilang mga sikat nga lola ug lolo sa Philippine showbiz ug kon unsay ilang mga nahimong kinabuhi sa una nunot sa atong paghandum sa Grandparents’ Day karong Dominggo, Septiyembre 11.
Carla Abellana / Instagram Apo ni Delia Razon
Si Carla Abellana ang apo sa movie icon nga si Delia Razon. Ang iyang anak nga si Rea Reyes maoy inahan ni Carla kinsa nidako sa iyang Lola Delia nga buhi pa sa edad nga 91 ug maoy inspirasyon ni Carla sa pag-artista.
Janine Gutierrez, Apo ni Eddie Gutierrez
Ang throwback picture ni Janine Gutierrez dihang giselebrar sa iyang Lolo Eddie ang ika-80 nga kasumaran niadtong Pebrero 6. Si Janine apo ni Eddie sa aktor nga si Ramon Christopher kinsa maoy bunga sa pagminahalay nila sa singer nga si Pilita Corrales niadtong 1971.
Kiko Estrada, Apo ni Pacquito Diaz
Si Kiko Estrada ang bunga sa pagminahalay niadto nilang Cheska Diaz ug Gary Estrada kinsa puros na nangaminyo sa lain. Si Cheska anak ni Pacquito Diaz samtang si Gary anak ni George Estregan.
Andi Eigenmann Apo ni Eddie Mesa
Si Andi Eigenmann anak ni Jaclyn Jose sa aktor nga si Mark Gil kinsa ikaduha sa tulo ka mga anak sa magtiayong aktor nga silang Eddie Mesa ug Rosemarie Gil nga tua na nagbase sa Amerika.
Jake Cuenca Apo ni Manoling Morato
Sigon sa Pep.ph ang papa ni Jake Cuenca nga si Juanito Cuenca anak sa igsuong babaye ni Manuel “Manoling” Morato nga si Elvira. Si Morato nga kanhi pangulo sa MTRCB namatay sa miaging tuig tungod sa Covid.
Donny Pangilinan Apo ni Tony Ferrer
Si Donny Pangilinan apo ni Tony Ferrer sa iyang anak nga si Maricel Laxa (kinsa anak ni Tony Ferrer sa aktres nga si Imelda Ilanan). Si Antonio Laxa sa tinuod nga kinabuhi ang James Bond of the Philippines niadtong 1970s.
Valeen Montenegro, Apo ni Mario Montenegro
Gipakita ni Valeen Montenegro ang newspaper clipping diin na-feature ang iyang Lolo Mario Montenegro nga usa ka sikat nga aktor niadtong dekada 70. Ang mama ni Valeen nga si Honeylet maoy anak ni Mario. Ang aktor namatay niadtong 1988, duha ka tuig sa wa pa natawo si Valeen.
Vito Quizon, Apo ni Dolphy
Wala lang hibaw-i 13 anyos na ang anak ni Vandolph Quizon nga si Vito ug usa na sa mga regular cast sa GMA’s “Happy Together.” Si Vito unang nigawas sa Going Bulilit sa edad nga singko. Idol niya ang iyang Lolo Dolphy ug Lola Alma Moreno.