GIANUNSYO sa Cebuano boyband nga SouthKingz nga mabati ug makita na ang ilang bag-ong original composition nga “Ngiti” sa ilang YouTube Channel.
Ang SouthKingz mao silang JayR Antoque (band leader), Jake De la Victoria, John Croz, Douglas Daldea, Taklo Gamberra, Istephen Perpetua ug Lyle Cabahug.
Ang uban ani nila nagtrabaho na sa BPO samtang ang uban dunay negosyo. Apan tungod sa ilang hilig sa musika mao nga nagkasuod nga maora na sila og managsuon. I-check ang ilang YouTube channel nga SouthKingz.
ANNIVERSARY BALL
Malipayon usab nga gianunsyo sa Cebu Young Talent ang ilang umaabot nga pito katuig nga anibersaryo.
Pinaagi sa pagtugot sa lokal nga gobyerno mahinayon ang ilang matag-tuig nga Anniversary Ball nga dunay 40% lang sa total nga capacity sa ilang venue karong Nobyembre 21, 2020 nga nagbitbit sa temang “The New Normal”.
Gitakda nga ipakita sa mga batan-on ang mga nagkalain-lain nga gown ug suits nga ginama sa mga iconic local designers sama ni Griffins Malazarte. Abangan!
IIYAK SA ULAN
Tisoy-tisoy man diay ning bagitong composer nga maoy nag-compose sa bag-ong single ni Piolo Pascual nga “Iiyak sa Ulan.”
Imagine, tua sa Bohol nagbase ug walay koneksyon pero ang iyang kanta maoy napili. Unsa kahang hitaboa? Basaha ang iyang estorya sa atong Ssssuper Ka karong Huwebes.
MORENO-SOTTO?
Duna nay umaabot nga bag-ong presidente ang Amerika. Ang Pilipinas kaha makabaton sad kaha og bag-ong presidente sa 2022?
Kon kinsa may sunod mag-presidente sa Pinas dapat dili lang isog kundi duna say political will batok sa mga corrupt nga official.
Kon si Isko Moreno ug Vico Sotto kaha ang mag-tandem duna kahay tsansa? Mao ni silay most-admired politicians karon sa atong nasud. Parehong batan-on ug parehong dunay konek sa showbiz. Wow! Haha...