TALAGSAON kaayo nga ang taytul sa awit wala sa iyang mga titik. Duna ka ba’y nahibaw-an nga kanta nga ingon niini?
Aron inyong masabtan, atong lakbitan ang pipila sa mga best-selling singles of all time nga ang title wala sa lyrics ug unsay iyang kahulogan.
Sama pananglit sa 1975 iconic nga BOHEMIAN RHAPSODY (Queen) nga nagsimbolo sa personal nga pakigbisog sa bokalistang si Freddie Mercury nga iyang gitago sa maong awit;
UNCHAINED MELODY (Righteous Brothers) nga gisuwat og tuyo alang sa 1955 movie nga bahin sa piniriso;
NEW YORK MINING DISASTER 1941 (BeeGees) nga inspired sa tinuod nga hitabo diin tipik sa lyrics nangita sa iyang asawa. “Have you seen my wife, Mr. Jones?”
DANNY’S SONG (Kenny Loggins) ang 1970’s biggest hit ni Loggins nga iyang gitagik alang sa iyang igsuong si Danny nga bag-o lang nahimong amahan niadtong higayona. Apan nganong walay “Danny” sa kanta?
Ang CLOUDS SUITE (Bread), A DAY IN THE LIFE (Beatles), SONG FOR YOU (Chicago), SUPERSTAR (The Carpenters), ANNIE’S SONG (John Denver) ug THE LAZY SONG (Bruno Mars) ang laing mga sikat apan ang title wala gyud sa lyrics.
Sa OPM duna say mga simang ang taytul sama sa 214 (Rivermaya) nga gikutlo sa petsa sa Valentines Day ug sa unang linya nga “Am I Real?”.
Ang 2013 hit single nga BUKO (Jireh Lim) nga abi nimo prutas apan minubo diay sa “Buhay Ko.”
Naa usab ang ISANG LINGGONG PAG-IBIG (Imelda Papin), ANG HULING EL BIMBO ug OVERDRIVE (Eraserheads), PARTING TIME (Rockstar), MODELONG CHARING (Blakdyak), 24 HOURS (Cueshe), NARDA (Kamikazee), COOL OFF (Yeng Constantino) ug uban pa.
Apan bisan ang mga sikat nga kantang Bisaya duna say mga title nga wala sa lyrics. Basaha kon unsa ning mga kantaha...
“SUROYSUROY”
Kon fan ka og Bisrock siguradong suwito ka sa kantang “Suroysuroy” sa Missing Filemon. Apan nganong wala ang title sa lyrics? Ang ilang gigamit ang “Lakbay-lakbay” nga medyo Tagalog ang dating. Salikwaot man sa panan-aw sa uban hinuon ang importante nisikat ug nagmalampuson.
“BALAY NI MAYANG”
Ang Balay ni Mayang ang nidaug sa ikatulong ganti sa 2013 Visayan Pop Music Festival. Gi-composed sa real-life couple nga Kyle Wong ug Marianne Dungog base sa ilang kasinatian nga naa ra sa balay magkita tungod kay estrikto ang mga ginikanan ni Mayang. Usa ni sa pinaka-popular nga kanta sa Vispop.
“SENIOR CITIZEN”
Daghan ang nagtuo nga “Ang Tigulang” ang title aning Bisrock hit sa bandang Aggressive Audio tungod sa chorus nga puwerte og recall apan Senior Citizen diay. “Ang Tigulang bisag bako...”
“PASKO SA USA KA BINILANGGO”
Usa ni sa labing sikat nga Visayan Christmas songs. Apan tungod sa kadugay na walay public records kon kinsay composer o asa na ang nagkanta. Buhi pa ba sila?
“SUGID NI MARIA”
Mao ni ang grand prize sa katapusang 40th Cebu Pop niadtong 2020 nga gi-composed sa Boholanang si Joseph Gara. Naghubit ni sa tinuod nga hitabo dihang namatay ang pamanhunon sa igsuong babaye ni Gara tungod sa road accident.
“KAUSA NABASA ANG TUBIG”
Grabe ang impact aning kantaha niadto sa mga Cebuano nga maoy nakapadaug ni Allan Jayme Rabaya sa ikatulong ganti sa unang Cebu Pop niadtong 1981. Hangtod karon nagpabiling tanghaga kon unsay buot ipasabot aning awita.