(Warning: Kining maong artikulo posibleng maka-spoil sa pipila ka mga plot ug detalye sa pelikula.)
Ang Mission Impossible: Dead Reckoning Part 1 tugob sa ka kulbahinam, grabeng aksyon, panglansis, ug mas banyaga nga mga kontrabida.
Nakaingon ko og panglansis tungod kay usahay maglibog ka kon kinsa na ang imong gitan-aw. Sama sa opening scene nga kaduha nag-ilis-ilis og nawong si Tom Cruise gamit ang maskara mao nga hasta ikaw morag mailad. Imposible tinuod apan makalingaw.
Apan makabilib nga sa edad nga 61 makasugakod pa si Tom Cruise og mga death-defying stunt nga walay double lakip na ang pagmotorsiklo sa mga habog nga pangpang, pakigsumbagay ibabaw sa nagdagan nga tren, makigginukdanay og sakyanan nga nakaposas ang kamot, mag-skydive ug mag-parachute.
Sa papel nga spy agent Ethan Hunt ning ikapito nga franchise sa Mission Impossible series, si Cruise nakigbatok ning higayona og “AI” (Artificial Intelligence) nga gitawag og “The Entity” nga gikahadlokang maoy motapos sa kaliwatan. Kinahanglan niyang pangitaon ang yawi sa “AI” aron mapakgang ang dautang laraw sa mga terorista nga gustong mokontrolar sa kalibutan.
Dili ka kabantay nga medyo taas diay ning salidaha (2 hours and 43 minutes) tungod sa kadaghang makalingaw nga mga esena labi na sa katapusang 40 minutos dihang gigukod na ni Ethan Hunt ang tren sakay sa motorsiklo (ug dayon sa parachute) aron luwason si Grace (Hayley Atwell), ang propesyonal nga kawatan nga nahimo niyang kaanib.
Wa kay ibasura sa cast nga puros nakahatag og saktong labok labi na ang karakter ni Paris (Pom Klementieff), ang babaye nga French assassin ug karatista nga kapila nakigbinukbokay ni Tom Cruise nga daw inspired ang kabangis sa pelikulang “Kill Bill.”
Naa gihapon dinhi silang Ving Rhames ug Simon Pegg, ang mga computer expert ug suod nga mga higala ni Ethan Hunt nga sakup sa iyang IMF Team (Mission Impossible Force).
Usa sab sa mga karakter nga nitatak ang kang Rebecca Ferguson isip M16 agent nga nakigdinunggabay sa kontrabidang si Gabriel (Isai Morales). Si Ferguson nga namatay aning salidaha unang nigawas sa MI: Rogue Nation (2015) ug MI: Fallout (2018).
Ang away nilang Gabriel ug Hunt ibabaw sa nagdagan nga tren nga niagi pa og tunnel, mao nga kinahanglan silang mohapa, makapaulpot sa lingkuranan.
Ug abi nimo natapos na human nakaeskapo si Gabriel sakay sa trak apan ang tren nga nagbitay sa pangpang usa-usang nangatagak ug hapit na sab mabugto ang ilang gikuptan. Apan ang samaran ug nagtinga na nga si Paris dinhi kalit nibutho ug gitabangan silang Ethan ug Grace. Kini isip pagtan-aw og utang kabubut-on nga wala siya tiwasi ni Ethan sa katapusan nilang panagharong.
Apan wala makawang ang ilang kahago kay nailog pagbalik ni Ethan ang yawi gikan ni Gabriel kinsa maoy dunay kasayuran sa nahimutangan sa “entity” nga siguradong adto na ipakita sa Part 2.
Sa tanang Mission Impossible way duda nga mao ni da best o kundi man gani usa sa pinakanindot.
5 MOVIE FACTS
1. Ang Mission Impossible: Dead Reckoning unang gi-shoot niadtong Pebrero 2020 apan naundang tungod sa Covid-19 pandemic. Gipadayon niana sab tuiga ug natapos September 2021.
2. Ang production budget niabot sa US$290 million tungod sa pandemic nga pinakadako sa maong franchise.
3. Sa interbyu ni Savannah Guthrie sa Today Show, matod ni Tom Cruise nga ang Dead Reckoning Part 1 and 2 mao nay katapusan sa Mission Impossible ug final portrayal niya isip Ethan Hunt.
4. Lakip sa location nila ang Italy, Norway, Switzerland, UK ug UAE sa direksyon ni Christopher McQuarrie.
5. Basi sa Studio Estimates, naka-US$235 million gross worldwide sales ang pelikula tulo ka adlaw gikan ni gipagawas.