Coco Martin ug Julia Montes moangkon na gyud kaha human sa mga tsikang kanunay nang nagpakita ang duha nga magkuyog?
Mas misamot karon ang isyu sa ilang tinuod nga relasyon kay silang duha ang mag-uban sa bag-o nilang mga proyekto karon.
Siguradong excited kaayo karon ang mga fans sa duha. Kon mahinumdoman nagsugod ilang loveteam sa teleseryeng “Walang Hanggan” kauban silang Richard Gomez ug Dawn Zulueta. Gikan dinhi nag-bida ang Coco ug Julia sa pelikulang “A Moment In Time.”
Mas misamot ang ilang mga supporter sa dihang nagbalik teleserye ang duha pinaagi sa “Ikaw Lamang” kauban silang Kim Chiu ug Jake Cuenca.
Sugod dinhi daghan na kaayo ang mga balita sa relasyon sa duha. Gani may mga huhungihong nga pirmeng magkita ang duha.
Mas midako og samot ang pagduda sa tanan sa dihang nabalitaan nga nag-uban ang duha gawas sa nasod kauban ilang isig ka pamilya.
Grabe ug daghang isyu ang atong nasugatan mahitungod kanila apan walay kompirmasyon gikan kanila.
Karon kaha may moangkon na labi pa nga may balik tambalan ang Coco ug Julia sa pelikula.
May nakita ta nga mga post sa Instagram ug Youtube nga nagtuyok ang duha sa Pola, Oriental Mindoro diin mao ang location sa buhaton nilang pelikula sa direksyon ni Brillante Mendoza.
Ug may lain pa kay nakita usab ang duha kauban silang Direk Erik Matti ug Richard Somes sa miaging buwan, laing proyekto kini diin makauban usab nila dinhi silang JM de Guzman ug Paolo Paraiso.
Pero ang pinakanindot niini ug malipayon ang tanan kay balik teleserye ang Julia Montes kay apil kini sa mga bagong cast sa “FPJ’s Ang Probinsyano.”
Kauban ni Julia isip mga bag-ong karakter dinhi silang Rosanna Roces, Tommy Abuel, Joseph Marco ug uban pa.
Dinhi kanunay na natong makita ug masundan si Coco ug Julia, may moangkon na kaha? Ayg Saba!
* * *
Si Ellen Adarna nag-walkout sa set sa katapusang lock in taping nila sa "John en Ellen."
Daghang tsika na ang migawas mahitungod niini pero walay kompirmasyon gikan nilang tanan.
Hangtod lang karon sa dihang na-interbyu si Long Mejia, ang komedyante nga kauban nila sa sitcom.
Matod pa niini nga dili daw maayo ang gibuhat ni Ellen, tiaw mo kanay molakaw lang kini ug miingon sa usa ka staff og "bye."
Shock ang komedyante kay sa kadugay na daw ini sa showbiz ug sa kadaghang mga artista na nga iyang nakauban sama nilang Dolphy, Eddie Garcia, Gloria Diaz ug uban pang bigating artista karon lang siya nakasaksi og ingon niini sa taping.
Matod pa ni Long nga "unprofessionalism" ang gipakita ni Ellen nga dili pa gani sikat ha.
Mao kini ang atong nasagap nga tsika karon ug paabot lang sab nato kon unsay tubag niini ni Ellen.
Sa atong nahibaw-an nga katapusan na lang tong ilang taping sa maong sitcom kay nakadesisyon ang manager ni Ellen nga dili na mobalik.
Kon unsay tinuod gyud ining tanan kini ato ra unyang mabasahan ang kamatuoran, di buh Long ug Ellen? Ay'g Saba!