Julia Barretto may bag-ong teleserye sa TV5 nga “Di Na Muli” siguradong malipayon kaayo karon ang mga fans sa aktres.
Dugay na man sab nilang gipaabot ang aktres nga makabalik sa serye mao nga karon excited na kaayo ni silang makita kini sa telebisyon.
Daghan na kitang mga nakita sa social media nga post mahitungod sa maong serye, una na gani ini gikan sa uyab niining Julia nga si Gerald Anderson sa dihang miduaw kini sa set niadto.
Gisundan sab kini sa mga post sa ubang cast sa maong serye, unya karon makita na usab nato nga gisugdan na og propaganda sa TV5 nga atangan ang seryeng “Di Na Muli.”
Mao kini ang unang teleserye ni Julia Barretto gawas sa ABS-CBN human kini mobalhin og management gikan sa Star Magic ngadto sa Viva Artist Agency.
Kasagaran sa mga kauban dinhi ni Julia gikan sa Viva Artist Agency gihatod sab kini kanato sa TV5 ug Viva television.
Makauban dinhi ni Julia silang Marco Gumabao, Angelu de Leon ug Bobby Andrews.
Kauban usab nila silang Marco Gallo, Katya Santos, Lander Vera Perez, Baron Geisler, Andre Yllana, Joe Vargas ug Krissha Viaje.
Wala pay eksaktong petsa kon kanus-a ni nato manuntan, ato lang gyud ning atangan sa singko “Di Na Muli” gikan sa direksyon ni Andoy Ranay , Ay’g Saba!
* * *
Daghan sab kaayo ang gikilig sa pag-angkon nilang Dominic Roque ug Bea Alonzo sa tinuod nilang relasyon.
Sa mga Instagram post lang nila makita sab nato nga malipayon kaayo ang duha karon nga opisyal na ang ilang panag-uyab.
Dugay nang natsismis ang closeness sa duha ug makita kini pirme sa mga litrato nga nangawas niadto mga trip sa gawas sa nasod, ang kanunayng presinsya ni Dominic sa mga piktyurs ni Bea ug sa sakyanan sa ulitawo nga kanunay makita usab nga nag-parking gawas sa balay sa dalaga.
Apan bisan pa ining tanan walay gi-deny ug gi-angkon sa duha hangtod lang karon nga gikan na gyud nilang Dominic ug Bea opisyal na gyud ang ilang relasyon, kongrats, Ay’g Saba!
* * *
Sa pelikulang “Pola” o red earth reunited usab silang direk Brillante Mendoza ug Coco Martin, kauban nila sa maong proyekto si Julia Montes ug Raymart Santiago.
Human sa pila ka tuig makatrabaho og balik ni Coco ang iyang mentor ang international award winning director nga si Brillante Mendoza.
Dako ang parti ni Direk Mendoza sa career ni Coco sa wa pa kini misikat og maayo sa telebisyon siya ang Prince of Philippine Independent Films.
Una kining gilusad sa pelikulang “Masahista” nga gisundan pa sa daghan kaayong mga indie movies.
Matod pa ni Direk Mendoza nga sama niadto way kausaban ang gipakitang kinaiya ni Coco hangtod karon.
Kon unsa kini ka bootan niadto mao gihapon ang iyang gipakita karon bisan pa sa iyang nakab-ot nga kasikatan.
Gumikan niini taas kaayo ang respeto ug pagdayeg sa direktor ngadto sa iyang mentor, Ay’g Saba!