MALIPAYONG Pasko kanatong tanan ug ania kami espesyal nga Pinaskohan para ka ninyo.
“Pangandoy Kong Belen,” may mga pangandoy nga lisod tumanon, may mga pangandoy usab nga dali rang matuman.
Aduna’y taas kaayong pangandoy apan may mga mabaw ra usab nga pangandoy.
Karong Disyembre 24 ug 31 sa alas 6 sa gabii sa CCTN channel 47 o Skycable 36 ug Youtube atong saksihan ang Christmas teledrama nga “Pangandoy Kong Belen” sugilanon sa kasilag, kalagot, pamilya, gugma ug pagpasaylo sa direksyon ni Sam Costanilla, sinuwat ni Ron Sumampong-Espere Einberg.
Sugilanon sa inahan ug anak, ug sa nahitabo sa inahan nga maoy nagtukmod niini nga kalagotan og maayo ang iyang kaugalingong anak.
Mahimo kahang malipayon ang Pasko alang kanila? May mga pagpasaylo kahang mahitabo?
“Pangandoy Kong Belen” gibituonan nilang Dulcita Batausa Siroy (Sinulog short film festival 2013 best supporting actress), Ben Jayma (Sinulog short film festival 2016 best supporting actor), Yon Maningo (Sinulog short film festival 2018 best actress), Dan Sy Lopez (4th SineGugma Cebuano film festival 2018 best actor), Shawna Irizari-Seniedo (Pilar Pilapil performing arts academy 2015 best supporting actress ug Atty. Jimbo Borgonia (former USC theater guild member ug 3rd district board member).
Sa dihang miduaw ko sa set ug nag-shoot sa among eksena ni Sanden Anadia (may espesyal nga partisipasyon dinhi), akong nasaksihan kon unsa katotok ug kaayo ang production sa tanan ang cameraman nga si Nilo Cabarles ug ang mga P.A. nga silang Anne Balagas ug Noel Argoncillo.
Labi na gyud ang director nga Sam Costanilla mao siguro nga sayo ug dere-derecho lang ang pag shoot sa maong teledrama.
Nahimo usab nga malampuson ug alegre ang gipahigayong presscon sa Fort San Pedro. Salamat kang sir Edwin Dela Cerna, executive director dinhi ug sa tanang media nga mitambong ug misuporta kanamo.
Mao nga ayaw gyud ninyo sipyata kining unang Christmas teledrama nga hatod kanato sa Telelilas Kalingawan ug Cebu Catholic Television Network “Pangandoy Kong Belen” karong Disyembre 24 ug 31, 6pm sa CCTN channel 47, atangi! Ay’g Saba!
* * *
Nora Aunor ug mga anak niini hangtod karon wala pa diay magka-ulianay sa maayong kabubot-on.
Dugay naman kini natong nadunggan ug gani may mga higayon pa nga atong nasayran nga maayo na sila sa usag-usa.
Pero na-ukay na sab ang tanan gumikan sa wala pagtunga sa anak ining si Ian de Leon sa party nga gipahigayon sa inahang si Nora Aunor.
Manghinaut lang ta nga ma-sulbad ug matagaan og solusyon kon unsa may problema sa ilang pamilya, labi na karon nga nagsingabot ang Pasko, Ay’g Saba!