NAHITABO na ni nako upat ka higayon sa una. Ang buot nakong ipasabot ang pagbati og kasubo sa pagkamatay sa usa ka idolo o linalang nga gitahod ug gimahal bisan pa man kon di kini paryente.
Nasubo ako niadtong namatay si Karen Carpenter, Princess Diana, Pope John Paul II ug Michael Jackson. Dako ang akong pagdayeg ug pagtahud kanila tungod sa ilang maayong nabuhat sa ilang tagsatagsa ka field.
Mao nga di ko moyamiid o mobugalbugal niadtong nihilak ug nagsubo sa pagkamatay ni Kobe Bryant. Di lang ang mahiligon sa basketball ang naapektohan sa iyang pagpanaw.
Kini tungod kay sa iyang kamaayong tawo, duna siyay mga gihimo nga nakabenepisyo sa daghang mga tawo bisan gawas sa dula nga basketball. Mga pahasubo sa mga kabanay, mga higala, mga fans ug uban pa.
Atong i-ampo ang kapahulayang dayon sa kalag ni Kobe, sa iyang anak nga si Gianna ug sa ubang naapil sa aksidente ug dali nga pagkahupay sa mga nanagsubo.
•••
May pagduda kon mo-klik pa ba ang KathNiel human sa dakong kalampusan sa pelikulang Hello Love Goodbye ni Kathryn ug Alden Richards. Duna usay mga panagna nga katapusan na sa JaDine di lang tungod sa nabalitang panagbulag nila isip managhigugmaay lakip ug labaw na sa pagbulag nila sa Viva Entertainment.
Duna pay uban nga di lang ang JaDine ang kuyaw nga mahulog sa linaw, matunaw ug mahanaw kon di sila mismo si James ug Nadine. Namahayag ang Viva nga di ingon ana kasayon ang pagputol sa kontrata nga gihimo ni Nadine.
Unsay inyong pangagpas? Matinuod kaha ang mga panagna o bali ang resulta?
•••
Usa ko sa wala makatan-aw sa pagpili sa Binibining Cebu 2020. Nakalimot ko tungod sa daghang mga kalingawan kalabot sa Pista Senyor.
Pero di tingali ko makalimot kon may nadawat kong imbitasyon. Wa hinoon ko mahinugon kay puol na man ang mga beauty contests alang nako; puparehas ang mahitabo, lahi lang ang dagway sa mga kandidata.
Wa gani nako tiwasa ang Ms. Universe dihang natagak na si Gazini Ganados. Pero unsa katinuod ang hungihong nga mao nga daghan sa mga taga media sa Cebu nga wa makadawat og imbitasyon kay mas gipaboran ang mga bloggers sa kaulohan?
Aw... unsa diay?