SA PAGDAUG ni Nadine Lustre og laing best actress award sa bag-ong gipahigayon nga Gawad Urian Awards, daghan ang nagtoo nga siya na gyud ang bag-ong Darna.
Niadtong Martes, sa programang Tonight With Boy Abunda namahayag usab si Vickie Rushton nga usa usab siya sa nangandoy nga makadala sa maong papel.
Sa kaseksi ni Vickie nga nanghakot og special awards sa Bb. PIlipinas 2019 pageant (bisan tuod napakyas siya paglangkat og korona), angayan usab kining mag-Darna.
Pero samtang wala pa mohatag og official statement ang Star Cinema, wa pa gyuy seguro kon kinsa ang palarang artista nga napili aron modala sa papel sa Pilipinang super hero.
Ug wa pa sab ko molunga sa akong pangandoy nga makita si Maja Salvador nga motulon sa bato, motuyok og mosinggit og: ‘Darna!’
•••
Usa sa akong giatangan karong semanaha mao ang konserto ni Jed Madela nga Higher anha sa grand ballroom sa Waterfront Cebu City Hotel & Casino. Samtang excited kuno si Jed kay dugay na siyang wa maka-perform sa usa ka full concert sa Cebu, dugay na sab kong wa kakita ug kadungog niya nga nikanta sa linawas.
Wa pa hinoon koy seguro kon makatan-aw ba kay sa pagsulat nako niini, wa pa koy tiket. Paet!
•••
Sa Hulyo 31 diay ipasundayag ang pelikula nila ni Kathryn Bernardo ug Alden Richards nga nag-ulohan Hello Love, Goodbye.
Ganahan ko motan-aw niini kay gusto kong masuta kon may chemistry ba ang duha. Gusto sab kong makatino kon suportahan ba sa mga supporters sa mga paresan nga KathNiel ug AlDub bisan pa kon di gyud ang orihinal nga pares ang mga bida.
•••
Ug niabot na gyud ang ting-ulan matud sa Pag-asa. Niadtong Biyernes sa niaging semana, kusog kaayo ang ulan sa dayon kong sakay sa MyBus gikan sa SM Seaside City Cebu padulong sa Fuente Osmeña.
Nagplano unta kong motan-aw sa X-Men Dark Phoenix pero tungod sa ulan, dugay ko nakasakay (dyip o taksi) padulong sa Ayala Center Cebu. Hinaut nga makatan-aw na ko karong semanaha. Pwede sab apilon ang Clarita kon gisalida pa.
Makalingaw sab paminawon ang singgit sa mga nanan-aw.