Si Julia Montes diay ang ilang gipasabot nga dunay importanteng karakter ang mosud sa FPJ’s Ang Probinsyano nga mao kunoy magsilbing grand finale sa maong serye nga mag-unom na katuig karong September.
Ang chika nga kutob na lang karong September ang Probinsyano kay mosang-at na sa iyang sertipiko de kandidatura si Coco sa pagka-senador. Samtang si Jane de Leon mo-exit na sa Probinsyano karong Agusto kay magsugod na sa taping sa iyang Darna: The TV series.
Si Coco ug Julia Montes duna say gihimo karong pelikula nga gi-shoot sa Pola Oriental Mindoro ubos sa direksyon ni Brillante Mendoza. Apan kay balik-MECQ man natanggong sad ni sila karon.
MGA SAAD
Nasayud ba mo nga mokabat na sa P55 million ang cash pledges nga nadawat sa first Olympic gold medalist nga si Hidilyn Diaz?
Kini wa pay labot sa condo worth P14-M, house and lot worth P4-M, ug lain pang house and lot nga gisaad ni Duterte.
Apan matuman ba kaha ni ilang mga saad nga wa pa man gani kadawat hangtod karon si 1996 silver medalist-turned-actor Onyok Velasco sa ilang mga saad sa una?
“FOOD PACKAGE”
Tungod sa pag-viral sa chicken cordon ug escabeche daghang mga meme ug kanta ang nag-trending sa social media.
Pero ang nag-trending gyud sa tanan ang kantang “food package” (to the tune of Spaghetti by Sexbomb) ni Kabingka Jade nga naka-3 million views sud lang sa tulo ka adlaw.
Daghan diay nig mga Bisaya version sa mga sikat nga kanta si Kabingka Jade nga nag-viral na. Duna sad siyay kanta bahin ni Presidente Duterte nga nakatawag sa atensyon sa mga PSG mao nga gipatawag siya ni Duterte sa Manila. Basaha ang atong Sssuperka karong Huwebes kay malingaw gyud mo sa iyang mga chika.
BAHALA NA
Karong balik na sad sa estriktong quarantine classification ang Sugbo mas maayong magpuyo na lang gyud sa balay kon wa moy importanteng tuyo sa gawas.
Kakita man tingali mo sa Facebook nga daghan kaayong sakyanan ang naglinya sa gawas sa ospital ug duna nay mga oxygen nga gimuntar tungod kay puno gyud ang tanang mga ospital mao ang mga pasyente didto na lang gitabang sud sa ilang mga sakyanan.
Dili ni komedya ang nahitabo karon. Kanus-a pa kaha ni mahuman? Mas maayong magpabakuna na lang gyud aron duna tay proteksyon. Bahala na. Papapapapa-bakuna!