Sa SWS Survey nikabat na sa record high nga 45.5 percent o 27.3 million ang nawad-an og trabaho sa Pilipinas tungod sa pandemya.
Usa sa mga naigo pag-ayo nga sektor ang entertainment mao nga bisan ang sikat nga aktor nga si Eric Fructuoso namasada na lang og tricycle aron lang dunay ikabuhi sa iyang pamilya.
Pun-an pa nga gisirad-an ang ABS-CBN samot nga naglisud gyud karon ang mga taga-showbiz. Dako sad ni og epekto sa gobyerno kay sagad sa mga top taxpayer sa Pilipinas mga Kapamilya star baya.
Imagina, pila ka mga dagkong artista sa ABS-CBN ang naa sa listahan sa top 500 individual taxpayer sa Pilipinas ang posibleng mokunhod na ang kita tungod sa pagkawala sa ilang mother studio.
Kahibawo tang tanan nga ang mga dagkong artista sa Pinas naa sa ABS-CBN sama nilang Vice Ganda, Boy Abunda, Sharon Cuneta, Piolo Pascual, Anne Curtis, Regine Velasquez ug daghan pa kaayo.
Bisan og nibalhin sa digital karon ang ABS-CBN apan lahi gihapon kon naa sila sa free TV. Tingali kon mokusog na ang signal sa internet sa Pilipinas ug maka-afford na ang kinabag-an anha pa tingali ta makaingon nga andam na ta sa digital.
Apan hangtod nga naputos sa korupsyon ang atong nasud ug puros pamulitika ang naa sa utok sa atong mga lider ug ignorante gihapon si Juan dela Cruz sa tinuod nga nahitabo nan wa gyud tay mapaabot nga kabag-ohan.
Balik ta ni Eric Fructuoso beh. Sa akong nahibaw-an duna ni silay construction business sa iyang misis. Basin wala silay projects kay pandemya mao nga namasada na lang?
Si Eric tulo ang iyang anak sa iyang kasamtangang misis ug usa sa iyang ex-wife. Ang regular TV project niya last year “Kadenang Ginto” ra, unya karong tuiga kadto rang 24/7 sa ABS-CBN. Mao tingali medyo gipit karon ang aktor.
Sa bata-bata pa daghan sad ni siyag nauyab sama nilang Claudine Barretto (una ni silang nagkauyab before napunta si Claudine kang Mark Fernandez), Ara Mina, Joyce Jimenez, Aubrey Miles, Priscilla Almeda, ug motuo mog sa dili si Toni Gonzaga.
Gibutyag ni Eric sa interbyu sa Forbidden Questions segment sa radio program ni DJ Mo Twister niadto nga usa sa iyang mga nahimong girlfriend si Toni sa dihang pareho pa kuno silang naa sa GMA-7.
Sa interbyu sa Pep niangkon si Toni nga nangulitawo niya si Eric apan wala kuno niya ni sugta kay 15 anyos pa lang siya niadtong higayona. Apan kon nagdugay pa si Eric sa pagpangulitawo niya hayan iya kuno ning sugton kay super close sila during sa ilang younger years.