NAHUG diay nig kuwartahay ang online voting karon sa virtual challenges sa Miss Universe Philippines.
Libre kon kausa ra ka moboto sa usa ka adlaw apan kon mosubra na duna nay bayad. Sa 3 votes-P49; sa 20 votes- P249; ug sa 50 votes-P499.
Ang Top 3 sa total highest votes maoy automatic makasud sa Top 30 isip official candidates. Samtang ang mahibiling 27 slots maoy pilian sa mga hurado. Then back to zero na ang standing sa Coronation Night karong Sept. 25 sa Manila. Bale wala nay kuwenta kon kinsa may nag-Top 3 sa virtual challenges.
Apan bisan na, mas nakapabor gihapon ang kanunay naa sa Top 3 kay sila may trending pirme nga mura ba’g gikundisyon na ang hunahuna sa mga tawo nga sila nay dumadaug.
Grabe kaayo silag recall sa publiko unya diay nakadaug lang sila tungod sa kuwarta? Dili diay tungod kay deserving sila? Unsa ba!
TAX SA VLOG
Maayo tinuod nga buhisan na ning mga content creator ug social media influencer nga dagko kaayog mga kita sa vlogging aron makatabang sad sa atong ekonomiya.
Kabantay mo daghan sa mga celebrity ang nag-vlogger sad karon kay kahibawo man sila dunay dakong kuwarta sa vlogging.
Sa 1K views gud mahimo kang mokita from P95 to P240. Kon i-view sa audience ang ads sa imong video mao nang modako ang bayad. Mas modako sad kon sa laing nasud gi-view ang imong video.
Apan di mo angay mabalaka kon small-time vlogger ra mo kay basi sa BIR ang mga nikita og below P250K net per year exempted ra sa tax.
`SEPTEMBER’
Kahibawo ba mo nganong daghan kaayong kanta bahin sa buwan sa September?
“Do you remember the 21st night of September”... “See you in September”... “Wake Me Up When September Ends”... “I see you in September when summer is gone...”
Nikanta ka no!? Bitaw, espesyal ning buwana kay mao ni sinugdanan sa “ber” diin magsugod na og patukar og mga mananoy nga Paskohanong awit labi na sa mga mall. Apan unsaon nga pandemic man. Happy “ber” na lang ninyo para ugma. Bahalag nihit sa budget uy basta maayo lang ang lawas sa tanan. Amping jud ta kay lisud na!