MAKASINATI na og mas nindot nga signal ang mga residente sa Barangay Bonbon, bukirang bahin sa dakbayan sa Sugbo tungod sa gitukod nga cell site sa Globe.
Niadtong Martes, Enero 8, dihang hingpit na nga gilusad sa Globe inubanan ang kadagkuan sa Barangay Bonbon ang pormal nga operasyon sa bag-o nga cell site.
Usa ka 20-metros nga torre ang gitukod diin usa ngadto sa duha ka kilometro nga signal range ang maabot usab sa silinganan nga barangay, ang Barangay Sudlon 1.
Matod ni Patrick Gloria, director sa External Affairs VisMin sa Globe Telecom, nga si Cebu City Mayor Tomas Osmeña nihangyo nga taoran og mga cell site ang mga bukirang barangay sa dakbayan sa Sugbo.
“The entire mountain barangays nga walay coverage sa una butangan. We acknowledge the fact that number 1, people need it. Everyone needs it. And then ang programa ni Mayor Tomas, siya may nag-push sa amoa kaning mountain barangays because of the Angkas before. They’re difficult to come out, to go to the city tungod kay wala silay connection ba so karon, kay makatawag na sila.”
Duha ka cell site ang gitukod sa Globe Telecom sa mga mountain barangay sa Cebu City, lakip niini ang sa Bonbon ug sa Barangay Guba.
Samtang adunay laing tulo ka mga barangay padayon nga gitukod ang mga cell site lakip niini ang Barangay Sirao, Babag, ug Tabunan.
“Temporary pa na sya. Ang permanent takes about seven or eight months because of the paper work. So we have to put a temporary site para naa ra dayon while ginabuhat ang paper work,” matod ni Gloria.
Ang maong cell site adunay signal nga 2G ug 3G diin temporaryo pa ug sa mga sunod nga mga semana, ilang i-upgrade ang signal sa LTE.
Dugang niini nga adunay 22 ka mga cell site nga tukuron sa Cebu City, “We need to help people. We need to help educate people. We try to educate them. Mao gyud na ang number 1 nga rason.”
Si Eduardo Cabriana, barangay kapitan sa Bonbon, niingon nga dako kini og tabang sa ilang barangay labi na kung dunay emergency.”Sa unang panahon nga wa pay signal, kung naay emergency, ig-abot namo didto sa Babag, adto pa mi una makahibaw nga naay emergency. Ang emergency nga buntag sayo, kung di mi kadulhog o kaadto sa siyudad anang buntaga, di gyud mi makahibalo nga naa diay emergency,” matod niya.
Si Lenson Cantolijao, 43, lumolupyo sa maong barangay, niingon nga malipayon sila nga aduna nay signal sa ilang lugar, “Sa una naay signal pero hinay kaayo nya karon kay bisag asa mi, bisag maghigda mi naa nay signal.”
Matod niini nga mas mikusog karon kaysa sauna nga kinahanglan pa sila mogawas aron makakuha og maayo nga signal.
Ang Barangay Bonbon adunay di mominus 6,000 ka mga lumolupyo.