OPM legends kinsay ilang presidente?
Di ikalimod nga dako kaayo ang gihuptang papel sa showbiz ning umaabot nga presidential election labi na sa OPM industry nga nagsilbing front-act sa mga political rally diin ang ilang partisipasyon nagtimaan usab sa ilang endorsement sa maong kandidato. Tan-awa kon kinsa sa mga OPM legend ang lunod-patay ang suporta sa ilang manok. Makaimpluwensiya kaha ang ilang opinyon sa umaabot nga piniliay?
APO HIKING SOCIETY / FACEBOOK
Sa miaging 2016 presidential election, nagkasungi ang Apo Hiking Society tungod kay si Rodrigo Duterte ang gipaluyohan ni Danny Javier. Apan karon nagkahiusa sila kang VP Leni Robredo. Apan si Javier wala katunga sa birthday rally ni VP Leni sa Pasay city niadtong Sabado tungod sa giingong health issue.
ELI BUENDIA / INSTAGRAM
Niadtong Marso 31 nagpagawas ang Eraserheads ex-vocalist og bag-ong version sa kanta niyang “Metro” isip suporta nilang VP Leni Robredo ug Kiko Pangilinan nga matod niya, “I respect and admire.”
MIKE HANOPOL / FACEBOOK
Usa sa mga pambato sa BBM-Sara UniTeam ang 76-anyos rock icon. Makita sa YouTube si Mike Hanopol nga gikantahan pa niya si Bongbong ug Sara atol sa ilang miting de avance.
FREDDIE AGUILAR / INSTAGRAM
Di lang kausa kundi kaduha gyud giendorso ni Ka Freddie si Manny Pacquiao. Una, sa proclamation rally niadtong Pebrero ug ikaduha, sa grand rally niadtong Sabado, April 23 sa San Juan City. Apan Nobiyembre 2021 giendorso usab niya si Bongbong Marcos Jr.
AEGIS BAND / FACEBOOK
Walay pormal nga deklarasiyon ang bandang Aegis kon kinsay ilang presidente apan base sa live performances nila sa grand rally sa UniTeam lakip na sa Sugbo niadtong Abril 18, tataw nga BBM-Sara supporter sab sila.
CHITO MIRANDA / FACEBOOK
Niadtong Dominggo giendorso sa `Parokya ni Edgar’ vocalist ug sa iyang misis ang kandidatura nilang VP Leni ug Kiko Pangilinan. “Sa mga hindi nakakaalam uncle ko po si Kuya Kiko (mag-pinsang buo sila ng Dad ko)...” tipik sa FB post ni Miranda.
DULCE / FACEBOOK
Ang Cebuana singer ang usa sa mga vocal sa social media sa iyang suporta sa BBM-Sara UniTeam. Sa proclamation rally gikanta ni Dulce ang “Umagang Kay Ganda” nga kabahin sa tema nilang “hope and unity.”
RYAN CAYABYAB / FACEBOOK
Niadtong Abril 22, lima ka mga national artist nga naglakip ni Ryan Cayabyab gikan sa grupong Katipunan sa Kultura at Kasaysayan (KKK2022) ang mipadayag sa ilang suporta kang VP Leni ug Kiko Pangilinan.
VIC SOTTO / INSTAGRAM
Kon padaghanay og celebrity supporter, siguradong dili mabintahaan silang Tito Sotto ug Ping Lacson. Sa kadugay na sa “Tito, Vic and Joey” sa showbiz plus pa sa Eat Bulaga. Kini nagpakita lang nga dili lang star power ang sukaranan sa pagpili.
BILLY CRAWFORD / INSTAGRAM
Sa video nga gi-upload sa Instagram gipadayag sa TV host-singer ang iyang suporta ni Mayor Isko Moreno. “I wanted to make my own stand on this coming election. Gusto ko ng pagbabago hindi lang sa salita, pati na rin sa gawa.”