GIPADAN-AG na sa Bluewater Maribago Beach Resort, ang ilang higante nga Christmas Tree nga gilibutan sa nagkadaiyang kolor ug gidak-on sa mga parol timaan sa pagsugod sa kasaulogan sa Pasko pinaagi sa naandan o tradisyonal nga pagsaulog sa mga Pinoy.
Sa maong paagi, buot sa Bluewater ang gi-ila nga usa sa ASEAN Green Hotel nga ma-preserve ang Filipino traditions.
Ang maong kalihokan gipahigayon niadtong Sabado, Nobiyembre sa hawanan sa Seven Dolphins Rotunda, Bluewater Maribago, Lapu-Lapu City.
Si Domiku Ugarte, assistant general manager sa Bluewater Maribago maoy nangulo sa parol lighting activity, awarding ceremony sa nagkadaiyang departmento sa ilang parol making contest diin ang criteria mao ang paggamit og indigenous ug recyclable materials.
Miguwa nga mananaog ang Purchasing Department, 2nd place ang Housekeeping ug 3rd place ang Engineering Department.
Gibuksan sab ang ‘Balay Pasko’ o ang Pinoy version sa gingerbread house nga puno sa lami-an nga pagkaon nga haom sa maong okasyon, dinhi gipasigarbo sa Bluewater chefs ang ilang original nga chocoron (chocolate coated chicharon) ug uban pa.
Mitambong sa maong kalihokan si kongresista Paz Radaza, first lady Cindi Chan, city councilor Queenie Amman. (FVQ)