SADSAD sa mga tiil
Warawara sa mga kamot
Kasingkasing usay tumong
Mao ang timgas nga pag-ampo.
Pit Senyor! Pit Senyor!
Kaluy-i kaming makasasala
Itisok sa among dughan ang gugma
Ug lipanga sa tanang panahon
Sa kinabuhi.
Senyor Santo Niño,
Ayaw itugot nga ang kadautan
Maoy maghari. Purila sa Imong
Gahom ang mga yawa
Ug ipatigbabaw ang kalinaw
Sa kalibutan.
Senyor Santo Niño,
Hinginli si Satanas sa among dughan..
Banwagi ang among dalan sa imong
Lamdag aron among makita ang
Katahom sa kamatuoran.
Pit Senyor! Pit Senyor!
Ania ang akong halad – sayaw
Sa paghinulsol sa kasaypanan
Namong tanan ug sa gugma namo
Kanimo sa tibuok nga panahon!