SA KADTONG mga gipul-an og kinaligo sa swimming pool diay mas exciting nga angayng ninyon suwayan, diin ang mga nangaligo ihampak sa bawod.
Nagpahipi sa Lut-od Pinamungajan – Lamac, Pinamungajan, Cebu ang ‘Hidden Valley Wave Pool and Mountain Resort.’
Moabot ngadto sa 52 km ang gilay-on kon manukad sa South Bust terminal sa dalan N. Bacalso Avenue, dakbayan sa Sugbo paingon sa maong dapit.
Gibana-bana moabot sa duha ka oras kapin kon kulang ang travel time, depende sab sa traffic situation.
Sa akong pagkala-agan, ubay-ubay na nga mga resort akong nasuroyan kuyog sa barkadda, pamilya ug kabahin sab sa akong trabaho isip photojournalist dinhi sa inyong kinaham nga pamantalaan sa Sugbo, Superbalita Cebu.
Dugay na kong nakadungog sa nabani-og nga wave pool sa maong lungsod.
Lalim ka swimming pool nga magbawod-bawod, hala kakuyaw!
Apan makalingaw nga dili ti-aw, nahatagan og katumanan ang akong pangandoy nga maduaw ang maong lugar.
Taympa ingon hidden? Makita man lage. Wave pool, unsa ni? Mga pangutana nga nagduwa-duwa sa akong huna-huna.
HIDDEN VALLEY
Ang termino nga hidden valley kon atong binisay-on nakatago nga walog, niadtong tuig 2000 unang gitukod ang training center building sud sa maong property.
Ang 14 ka ektarya nga land area nga gi-landscape ang nakadugang sa atraksiyon sa maong property.
Miliraw-liraw ang akong mga mata sa mga tanom diha sa palibot dunganan sa preskong hangin gikan sa bukid.
Nasangit ang akong mga mata sa kabaw nga misum-ok sa kabuwakan abi kog tinuod usa ra diay kini ka estatuwa, gitaparan sa higanteng kalabasa.
Apan ang maong straktura nga pormang kalabasa usa sab sa mga lawak nga mamahimong kapahuwayan sa mga guest nga kabahin sa ilang amenities.
Sa bungtod nga bahin makita ang nagbuhagay sa waterfalls nga maoy source nga tubig nga gigamit sa maong pool.
Haom kaayo alang niadtong gusto nga mag-relax o pag-unwind sa gikan sa kakapoy sa panarbaho o ang ka-busy sa uban pa nilang kalihokan sa siyudad.
NAGBAWOD-BAWOD
Igo nga nakapahiluna mi sa cottage nga among gi-abangan dayon hab-hab sa among gi-order nga pagkaon, akong gisusi ang pool area diin ako gilayong gi-andam ang akong camera nga kanunay nakong gisalib-ay.
Gawas sa pagkuha og hulagway sa katahom sa maong lugar lakip sab nakong gihulagwayan ang mga matahom nga dalaga nga pwerting enjoya sa bonding uban sa ilang mga higala.
Apan taod-taod lang mitingkag ang akong dunggan sa dihang milanog ang busina nga susama og tingog nga daw adunay barko nga modunggo sa pantalan.
Dayon kalit nanagan ang mga tawo gikan sa ilang nahimutangan nga cottage dayon layat sa pool.
Na-unsa ni sila?
Ang lanog nga busina madunggan matag 30 minutos nga tima-ilhan diay sa pagbawod.
Ang pool baluron sud sa 15 minutos.
Dunay nagkuptanay og kamot samtang misugat sa bawod, duna pay nagkapa-kapa nga na-unlod inig dayong hampak sa bawod.
Tungod sa kakusog sa pwersa sa bawod aduna pay nangabalitok dunganan sa sininggitay sa mga nangaligo tima-an sa ilang pagkalingaw.
Apan aron sa pagsiguro nga luwas ra ang mga guest sa posibleng pagkalumos gidesinyo ang pool nga dili lawom.
Gibana-bana nga taga-hawak nga gilawmon sa tubig sa regular nga gitas-on nga tawo.
Tungod kay millennial age na ta karon dili ma-iwit ang selfie ug aduna pay nag-vlog samtang mitu-asik ang tubig sa paghampak sa bawod.
DUGANG ATRAKSIYON
Gawas sa tulo ka matang sa pool: Wave pool, Mountain Resort pool ug Infinity pool adunay pang “adrenaline rush” nga kalingawan nga gitanyag ang maong resort.
Ang kulbahinam nga zipline ug intense sky bicycle.
Niadtong Oktubre 2017 gibuksan ang maong mga summer activities nakadugang sa pagpadani sa mga bakasyonista sa pagduaw sa maong mountain resort.
Sulit ang inyong pagbisita sa maong dapit kay siguradong dili magmika ang inyong panagway niining mga kalingawan.
Sa buot mag-overnight stay ang resort adunay 45 rooms nga haom sa singles, family o barkada sa ilang dormitory type rooms.
TURISTA
Atol sa akong pagsuroy way langyaw nga turista nga nasagol sukwahi sa mga miaging tuig sa wa pa ta gihamok niining pandemiya sa coronavirus disease.
Apektado ang tanan ilabi na ang patigayon may labot ang turismo.
Bisan ang mga local guest gikinahanglan nga motuman sa safety protocol ilabi na ang social distancing ug ang pagsul-ob og face mask.
Gilimitahan sab ang gidagdahon sa guest aron sa pagsiguro nga dili makalapas sa maong lagda nga gipatuman sa Inter-Agency Task Force (IATF).
Alang sa dugang kasayuran sa ilang bag-ong day tour ug accommodation rates mamahimong moduaw sa Hidden Valley and Mountain Resort Facebook page. Enjoy!