NALIPAY ko sa mga nabasahan nga sa pagsalida unya sa bag-ong Darna sa telebisyon, si Iza Calzado modala sa papel isip unang Darna nga mopasa sa kahibulongang bato ngadto ni Jane de Leon.
Di ko seguro kon inahan ba siya ni Jane ang ako lang nga naapil na gyud si Iza sa Darna nga kanhi iyang gipangandoy apan didto mapunta kang Angel Locsin.
Bisan pila na ka tuig ang nilabay, nindot pa gihapon og lawas Iza kay sige siyang nag-workout.
Ning bag-ong kalambuan, maingon ta nga gigantihan ang iyang paghulat ug padayon nga pag-atiman sa iyang lawas.
Nakatayming na sab kog video bahin sa Ms. USA 2016 nga si Deshauna Barber. Nalupigan niya si Ms. Universe 2015 Pia Wurtzbach nga katulo niapil sa Bb. Pilipinas (wa pa ang Ms. U Phils. niadto) una niya nakuha ang korona aron morepresentar sa nasud sa Ms. U.
Kapito gyud niapil si Deshauna sa Ms. District of Columbia una pa niya nalangkat ang korona aron makaapil sa Ms. USA 2016 diin nakoronahan usab siya.
Niadtong higayona, diha na sa US Army si Deshauna.
Duna man god kunoy babaye nga niduol niya nga nikombinsir niya nga moapil sa Ms. USA kay nakita kuno sa nauwahi nga mamahimong rayna gyud si Deshauna.
Isip motivational speaker, nadani ko sa gisulti ni Deshauna nga: “Ayaw kahadlok sa kapakyasan pero kahadloki ang pagbasul. Ayaw dawata ang tubag nga ‘no’ maoy kahadloki ang posibilidad nga makadawat kag tubag nga ‘yes’ pero ikaw mismo ang niguba tungod sa hukom nga moundang bisan wa pa mohagtok ang 12:00.”
Bug-at. Nindot.
Grupo sa mga call center agents ang ikaduhang nidaug sa jackpot nga P500K sa Everybody Sing.
Nag-ala Hidilyn Diaz si Vice Ganda isip host adtong gabhinona.
May props pa siya nga barbell nga morag tinuod tan-awon.
Natag-anan sa grupo ang napulo ka kanta pero taudtaud pa una natag-anan ang tanan. Ang unang nakadaug mao ang grupo sa mga drivers.
Kahinumdoman nga niadtong mga kasambahay ang gipaapil, P10K ra intawn ang nadaug sa grupo mao nga gipun-an ni Vice og P100K.
Nakahilak intawn ang nangapil lakip na ang mga lalaki.
Di gyud ta angay magdalidali sa atong mga lakang labi na kon emotional kaayo ta. Tan-awa ang nahitabo ni Enchong Dee.
Napugos kini pagpangayog pasaylo kang Cong. Claudine Bautista, sa iyang bana ug ilang mga pamilya tungod sa di maayong gikyaw-kyaw niini sa social media.
Apan human namahayag si Cong. Bautista ug natimbang-timbang ni Enchong ang nahitabo, nangayo kining pasaylo. Mao na diha!