‘Steel Magnolias’nagmalampuson

Ang hugpong sa teatro nga 2TinCans Philippines Inc. nagmalampusong nipasundayag pagbalik sa ‘Steel Magnolias’ niadtong Sept. 23-24 ug Oktubre 7-8, 2023, sa Siddhartha Theater, Guang Ming Institute of Performing Arts, V. Rama Avenue, Cebu City.

Ubos sa direksyon ni Vincent Paul Diez Gaton, ang cast nipakita og dili malimtan nga kasinatian. Gisubli ni Charlene Virlouvet ang iyang papel isip Truvy Jones, Liana San Diego isip Annelle Dupuy, Clariza Mae Sevilla isip Shelby Eatenton-Latcherie, Yvette Yntig isip M’Lynn Eatenton, ug Marlinda Angbetic Tan isip Clairee Belcher.

Si Sarah Mae Enclona-Henderson, producer sa ‘Steel Magnolias,’ nipaila-ila usab sa duha ka bag-ong mga miyembro sa cast: JoAnn Zaldumbilde, kinsa nagpuli-puli sa pagdula ni Clairee Belcher, ug Che Solon nga nagdula ni Ouiser Boudreaux.

Ang ‘Steel Magnolias’ nagpakita isip usa ka testamento sa gahom sa panaghigalaay, kalig-on sa pag-atubang sa mga hagit, ug ang dili matarug nga mithi sa tawo. Ang saysay nakadani pag-ayo sa mga tumatan-aw sa lainlaing pangedaron ug sa ingon ka talagsaon nga cast.

Gihatagan ni Direktor Gaton ang mga tumatan-aw og lawom nga mga panan-aw sa mga karakter ug sa ilang mga relasyon sa usag-usa.

Naila ang 2TinCans, sa ilang mga obra nga may kalabutan sa mga kasinatian sa tawo, pagpaluyo sa lainlaing mga adbokasiya ug uban pang mamugnaung mga tanyag. Gitinguha usab nila nga mahimong usa ka mamugnaon nga dangpanan ug plataporma alang sa mga artista, pag-uswag sa mahiligon sa arte, ug pagtubo sa industriya.

Alang sa dugang nga mga impormasyon ug updates, mamahimong mobisita sa 2TinCans’ Facebook ug Instagram page. / Jesson J. Morata