ANG replica sa imahen ni Senior Santo Niño moduaw sa dakbayan sa Lapu-Lapu ug isla sa Olango sunod buwan.
Si Mayor Paz Radaza nangulo sa gipatawag nga tigum tali sa mga opisyal sa Philippine Coast Guard, Lapu-Lapu City Police Office, school managers, barangay officials, Rev. Fr. Milton Medida kura sa St. Augustine Parish sa Olango lakip na ang rector sa Basilica Minore del Sto. Niño Fr. Pacifico Nohara Jr., OSA.
Gipangandaman sa city government ang maong kalihokan ilabi na nga kini maoy labing unang higayon nga dad-on ang imahen sa isla karong Agusto 10 diin si Cebu Archbishop Jose Palma mopahigayon og santos nga misa sa St. Augustine Parish.
Sud sa tulo ka adlaw mo-istar ang Sto. Niño ug i-prosisyon ngadto sa mga barangay sa Olango sa dili pa ibalik sa mainland Cebu.
Gidapit ni Fr. Medida ang mga parokyano ilabi na ang mga deboto sa Sto. Niño nga mosalmot sa maong kalihokan sa ilang simbahan. (PR, Teteth Mata - Espina)