WALA na seguroy makalupig kang Nelson kon maoy hisgutan ang kakugihan ilabi na sa mga buluhaton sa uma. Apan taliwala niini wala siyay kaugalingong yuta. Kaabag lang siya ni Ingko Jose nga may halapad nga kaumahan.
Ilong tuwapos na si Nelson. Bugtong siyang anak sa magtiayong Binog ug Mayling. Kinse pa ang iyang panuigon dihang nagsunod pagtaliwan ang iyang ginikanan. Tungod niini, nakat-on siyang manginabuhi nga mag-inusara. Hinuon, wala siya maglisod kay suheto na man siya sa mga buluhaton sa balay.
Karon trayentay sayis na si Nelson apan wala pa gihapoy asawa. Mataha man god siyang mangulitawo sa kadalagahan tungod sa iyang hitsura. Gawas nga putot o pandak, itom ug sagalsalon ang iyang pamanit samtang ang iyang ilong, sumala pa sa mga tigulang, samag gitumban og kabaw. Apan gidayeg siya sa mga tigulang tungod sa iyang kakugihan. Nakaingon gani sila nga palaran ang iyang maasawa.
Usa ka buntag nga nagsabod si Nelson sa mga binhi sa humay iyang nahunahuna nga pito ka adlaw na lang Valentine’s Day na. Bisan sa iyang kahimtang sayod siya unsay buot ipasabot sa Valentine’s Day. Gani, nangandoy usab siya nga makabaton og uyab.
Nahunong si Nelson pagsabod sa mga binhi sa humay dihang miduol si Ingko Jose ug nangutana kon wala ba siyay ka-deyt sa Valentine’s Day. Igo ra siyang mipahiyom ug milingo-lingo. Gitambagan siya sa tigulang nga dili ipakaminos ang kaugalingon kay ang babaye nga tinuod magmahal dili mag-isip sa hitsura sa lalake.
Nianang pagka ugma sayo nga miadto sa uma si Nelson kay nag-uwan nianang gabii. Iyang gisusi kon wala ba maanod ang gipangsabod niyang binhi. Mihangad siya sa langit. Maayo ang panahon. Iya na usab nahunahuna ang umaabot nga Adlaw sa Gugma. Pila na ka Valentine’s Day nga sa uma ra siya magyampungad.
Apan sa iyang pagpauli, nasugatan niya ang usa ka babaye nga ingon sa wala sa kaugalingon nga naglakaw daplin sa haywey. Duol man ugod sa dakong dalan ang iyang uma.
Naniga ang mga mata ni Nelson dihang natumba ang babaye nga naputos sa bun-og. Iya kining gisapupo, gisakwat ug gidala sa iyang payag. Paglabay sa pipila ka oras gibalikan sa panimuot ang babaye ug miagulo. Mibangon nga mahadlukon.
“Ayaw kahadlok, Inday. Dili ako dautan.”
Mitulo ang mga luha sa babaye nga wala magtingog. Gipangutana kini ni Nelson unsay nahitabo. Apan wala kini motubag ug midanguyngoy hinuon busa gipasagdan lang una niya.
Hapon na dihang gipakigsultihan pag-usab ni Nelson ang babaye. Iyang nakita nga maayo na ang pamatyag niini. Gani, sa iyang pagsulod mipahiyom na man kini. Ug gisugid sa babaye ang nahitabo. Usa diay kini ka babayeng binayran ug nag-alagad sa usa ka bar sa Danao. Gitabangan kuno siyag lugos sa unom ka lalake. Nahibaw-an ni Nelson nga patay na usab ang mga ginikanan niini sa Negros ug nahisay-a kini sa Sugbo aron mangitag trabaho apan nahibanlod hinuon sa bar.
Paglabay sa tulo ka adlaw, buot na untang mopauli si Lina apan gipugngan ni Nelson, kay pila ka adlaw na lang Valentine’s Day na. Sa mubong panahon nilang panag-uban iyang nabatyagan nga may migitib nga pagbati sa iyang dughan.
“Nganong gipugngan mo ako, Nel?” ni Lina.
“Mahimo bang ikaw na lang ang akong Valentina, Lin?”
Nakalitan ang dalaga. “Ha? Pag-syur, uy! Mopunit ka diay nako nga hugaw na man ko?”
“Sagdi lang kay mahimo pa man kang hugasan sa lunsay nga pagmahal!” Ug gigakos ni Nelson si Lina kinsa mibawos usab sa gibuhat sa ulitawo hangtod nag-ukobay ang ilang mga ngabil nga nagtagamtam sa dugamis sa gugma. (KATAPUSAN)