VIVENCIO TABASA
364 katipunan St., Labangon, Cebu City
Unsa, Danilo, mag-pusher ka? Uy, ayaw intawon niana, Dan, kay gawas nga makagay-ot na sa maayong pangisip ilabi na sa mga batan-on, supak usab na sa balaod! Duha ray sangputan pagka-pusher Dan: og dili mapatay, mapriso! Ayaw pagsunod kang Kumpare Berto!” tagawtaw ni Rose nga nakugang sa buot sudlan nga trabaho sa iyang bana samtang sila namahaw.
“Nahibawo ko, Rose. Apan unsa may igasto ta kang Arnold nga motaak na sa hayiskol inig abli sa klase? Sunod tuig, ang manghod, si Prissy, hayiskol na pod! Unsa may mahimo sa agi sa inabangan tang traysikad nga igo ra sa pamugas!” pahungaw ni Danny sa nagpuot niyang dughan nga gibalibaran ni Rose ang buot niyang buhaton.
“Maluoy ra ang Ginuo, Dan, aron makapadayon pagtuon si Arnold!” ni Rose nga mihapuhap sa abaga sa iyang bana.
“Ah! Kada adlaw tua kas simbahan, wa may grasyang gihatag ang imong Ginuo aron ta maluwas sa tumang kakabos!” ni Danny nga pinabundak ang tingog ug giwakli ang kamot ni Rose.
“Ayaw pagsultig ingon niana, Dan, uy, basig gabaan ka sa Ginuo!” ni Rose nga milugmaw ang mga lusok sa luha sa iyang mga mata.
“Ahh! hagbay ra tang gigabaan ning atong pagkabutang!” banghag ni Danny dayong angkas sa traysikad.
“Wa man nimo tiwasa ang imong pagkaon, Dan,” ni Rose nga nahiubos sa sinultihan sa iyang bana.
“Mamasada ko basig kaluy-an sa imong Ginuo!” masuk-anong tubag ni Danny.
Ang tinuod nadani si Danny sa agni sa iyang kumpare Berto nga sama kaniya, uyamot pod kaniadto apan karon sapian na isip drug pusher. Mag-abot sila sa balay ni Frank Wang (alias Mr. X) sa alas utso empunto karong buntag alang sa iyang unang supply.
“Nalangan hinuon kos yawyaw ni Rose, da!” ni Danny sa iyang kaugalingon nga kusog misikad sa traysikad. Pag-abot niya sa balay ni Mr. X nahibung siya sa daghang tawo nga nagpunsisok sa tugkaran sa balay. Miduol siya. Labihang kurata niya pagkakita sa patayng lawas sa iyang kumpare Berto, tupad sa patayng lawas ni Mr. X nga nanagbuy-od sa yuta. Nakita sab niya ang duha ka pulis nga nagkadugo. Mikurog si Danny nga naghunahuna kon wa pa siya malangan sa sermon ni Rose.
“Misukol sila, Sir. Patay si Mr. X , ang drug lord, ug tulo niyang sakop. Si PO2 Vergara naigo sa paa. Si PO2 Sanchez naigo sa tiyan ug serious. Mobalor og utso siyentos milyunes ang nasakmit nga drugas . PO3 Tablada reporting, Sir!” matod sa lider sa nag-ronda nga mga pulis, pinaagi sa iyang selpon nga nadungog sa mga usisiro nga nahiduol kaniya, lakip na ni Danny.
Midalig angkas si Danny sa traysikad. Nagkurog siya ug kusog nga mipadagan balik sa ilang balay.
Paghitangka niya sa pultahan nakuyawan si Rose nga nagtan-aw sa iyang bana nga labihang luspara ang dagway ug nagkurog ang mga ngabil.
“Dan. . .?” ni Rose nga nahibulong.
Kalit gigakos ni Danny si Rose.
“Patay si kumpare Berto didto sa balay sa drug lord diin sila gi-ronda. Rose, manimba ta karon kay mangayo kog pasaylo sa dako kong sala sa Ginuo!” ni Danny nga naghilak.
Nakahilak si Rose sa kalipay nga nakaamgo si Danny sa ka-peligro sa buot unta niining sudlan nga trabaho.
Didto unya sa simbahan esurpresa niya kang Danny nga nakadawat siyag sulat ganiha dihang igo lang nakatalikod si Danny gikan ni Fely, iyang maguwang nga naminyo og Amerkano, nga motabang kini sa galastohan sa ilang duha ka anak gikan sa hayiskol hangtod sa kolehiyo. Ug nagpadala pod og kuwarta aron ipalit og bag-ong traysikad ug motorsiklo. (KATAPUSAN)