GRO si Flordeliz sa beerhouse nga nahimutang sa Mango Avenue Square. Alas nuybe na sa gabii. Naglingkod siya sa bar counter ug naglingaw-lingaw pagdimdim og usa ka botelyang SanMig samtang nagpaabot og kustomer. Single Mom siya sa edad nga trayentay dos ug aron mabuhi niya ang anak sa lalaking unang nakapusgay sa mga gihay sa iyang pagka bulak, gisudlan niya ang kinabuhi nga lapukon. Nahimo siyang ‘belly dancer’ nga puwedeng bayran aron mosayaw atubangan sa lalake o grupo sa mga lalake nga eksklusibong motan-aw kaniya nga mosayaw ug maghubo sa pribadong lawak, bugti sa kantidad nga iyang pangayuon. Nahimo siyang call girl. May bayot siyang bugaw, si Dongkee. Nabatyagan ni Flordeliz nga dihay lalake nga mitupad kaniya paglingkod sa bar counter. Miorder kinig Pilsen. Milingi kini kaniya.
“Hai!” timbaya ni Flordeliz nga nagpahiyom. May prospek na siya karong gabhiona.
“Hi!” tubag sa lalake nga mibawos pagpahiyom. Ambongan kini.
Gibutang sa bar girl ang botelya sa Pilsen ug ang beer mug atubangan sa lalake.
“Waiting for someone?” ni Flordelz nga mitutok sa nawong sa lalake.
“Nope. Just letting the time pass by!” sa lalake nga mitubil sa Pilsen sa mug. “What’s your name?”
“Am Flordeliz. Yours?” ni Flordeliz. “Clark,” tubag ni Clark.
Paglabay sa pipila ka gutlo mora na silag daang managkaila. Mibalhin sila sa usa ka lamesa ug didto nagpadayon ang ilang estoryahanay hangtod nga mihagad si Clark nga manggawas sila ug mangadto sa usa ka dapit nga sila rang duha ug way makadisturbo. Misugot si Flordeliz. Lahi ang iyang gibati karon kang Clark kaysa mga ubang lalake nga gikadulog niya kaniadto sa kama. Sulod sa lawak sa motel napusgay na pod ang pagka bulak ni Flordeliz. Apan lahi ang kalipay nga iyang gibati karon. Nahigugma siya kang Clark.
USA ka gabii niana didto sa lawak sa laing motel naghisgot sila sa ilang relasyon.
“Flor, ulitawo pa ko sa edad nga 35. Gusto ko nga mag-live in ta,” matod ni Clark.
“Tagai kog higayon sa pagpalandong, Clark. Hunahunaon nakog maayo kon makaayo ba kini nako ug kanimo kon magpuyo ta,” ni Flordeliz.
“Kanus-a pa na? Dugay pa?” ni Clark.
Naghinuktok makadiyot si Flordeliz. Unya misulti siya, “Karong umaabot nga Dominggo birthday nako. Ikaw day akong dapiton sa panihapon. Isulti ko unya didto sa akong apartment ang akong hukom.” Gihatagan niya si Clark sa adres sa iyang apartment Nianang pagka Dominggo nagpalit si Clark og bouquet sa mga bulak isip gasa kang Flordeliz. Alas utso sa gabii ang oras nga gihatag ni Flordeliz kaniya. Misakay siyag taksi. Paghitangka niya sa pultahan sa apartment may nabati siyang mga tingog sa babaye ug lalake.
“Flor, pasayloa ko nga nibiya ninyo sa atong anak nga wa magpahibawo. Didto ko sa Davao nagtrabaho!” tibuok og tingog ang lalake.
“Okey, Dongkee, pasayluon tika! Apan ayaw na mi biyaig usab si Dodong, ha?”
Daw gikumot sa puthaw nga kamot ang kasingkasing ni Clark sa iyang nabati. Tinuod nga nahigugma siya kang Flordeliz. Dihay basurahan nga balde sa kilid sa pultahan sa apartment, Iyang gilabay ang bouquet sa mga bulak didto ug milakaw nga way lingi-lingi.
Giwaling ni Flordeliz ang kurtina sa apartment ug milili sa dyalusi. Nakita niya si Clark nga naglakaw pahilayo kaniya. Mituaw siya, “Pasayloa ko, Clark! Gihigugma tika, apan dili ako angay kanimo. Usa lang ako ka bulak sa basurahan ning akong kalibutan!”
“Luoy baya siya, no?” pinaluray nga tingog ni Dongkee, ang bayot nga bugaw ni Flordeliz. “Milampos ang atong drama, Yads!” (Katapusan)