DILI gyod makatuo si Ricardo nga magluib si Minerva, iyang asawa, kaniya. Apan kining mga litrato nga gipadala kaniya pinaagi sa private message sa Messenger sa internet lig-on nga ebidensiya nga si Minerva nagluib kaniya. Gi-download niya ang mga litrato sa iyang ‘laptop’ ug gi-printa. Klaro kaayo sa usa ka litrato nga nag-bikini ang iyang asawa ug giagbayan sa usa ka guwapong lalaki sa usa ka beach resort nga nahimutang sa dakbayan sa Lapu-Lapu. Duna pay nagagakos ang iyang asawa ug ang lalaki nga hapit na maghalok. Daw gikumot sa puthaw nga kamot ang iyang kasingkasing sa pangabubho.
Tulo na ka tuig sila nga kasado sa huwes ug duna silay usa ka anak nga babaye, si Ellen. Si Nelson, iyang ig-agaw igtagsa, ang nagpadala sa litrato uban ang mensahe nga angay siyang mopauli dayon sa Cebu aron sulbaron kining maong suliran sa iyang kinabuhi. Ania siya sa siyudad sa Cagayan de Oro isip temporaryo nga branch manager sa sangang buhatan sa kompaniya nga iyang gialagaran kay mi-resayin ang daang manedyer kay moadtoay sa Australia isip immigrant. Sales manager siya sa Cebu; mao nga siya ang gipadala sa CDO. Wa pay napilian ang ilang kompaniya nga mopuli kaniya bisan nakalabay na ang tulo ka bulan. Mihangyo siya sa Management sa head office sa Cebu City nga tugtan siya nga mobakasyon og usa ka buwan tungod sa problema sa iyang pamilya nga kinahanglan masulbad dayon. Misugot ang head office sa iyang hangyo. Ang sales supervisor sa CDO maoy mopuli una kaniya.
Dihang nahiuli na siya sa Cebu wa siya magpasabot kang Minerva sa iyang nahibaw-an nga kini nagluib kaniya. Matahom ug seksi ang iyang asawa. Nianang pagka gabii gitambalan ni Minerva ang kahidlaw nga gibati ni Ricardo sa iyang asawa diha sa kama sa ilang lawak.
“Erva, I love only you! Unta di ka magluib nako,” matod ni Ricardo human sa ilang pagminahalay ibabaw sa kama.
“Cardo, sumala sa akong gisaad nimo, di ko ikaw luiban. Ikaw lang ang lalakeng mahalon ko sa tibuok kong kinabuhi. Panggaon ko ikaw ug si Ellen,” ni Minerva.
Kalit nga mibangon si Ricardo ug namulong, “Bakakon ka, Erva! Wa malilong nako ang imong pagluib!”
“Hah?!” nahimalingka si Minerva kay nakalitan sa gipamulong sa iyang bana. “Naunsa na ka, Cardo? Nabuang ka? Pataka ka mag pamasangil!”
“Di ko buang, Erva!” ni Ricardo nga masuk-anong miabli sa iyang travelling bag ug gipagawas ang usa ka brown envelope nga maoy gisudlan sa giprinta niyang mga litrato nga gipadala kaniya ni Nelson nga maoy nag-kodak pinaagi sa kamera sa iyang selpon. Gitunol niya kang Minerva ang envelope. “Sige, tan-awa na tanan! Ug ingna ko nga wa ka magluib!”
Gipanan-aw ni Minerva ang mga litrato. Nahingangha siya sa iyang nakita. Apan wala dayon siya makatingog.
“Dili kini ako!” matod ni Minerva nga naghilak nga mitan-aw kang Ricardo.
“Di pa gyud moangkon ang maluibon!” ni Ricardo dayong gawas sa ilang lawak.
Sayo nga migawas si Ricardo sa ilang opisina nianang hapona. Miadto siya sa CT Mall aron mopalit og Barbie doll para kang Ellen. Didto sa mall nakit-an niya si Minerva nga kuyog ang guwapong lalaki nga kauban sa iyang asawa sa beach resort.
Miduol siya sa duha ug kalit nga gibitad si Minerva.
“Di na ka makapamakak, Erva! Sakpan na tika sa akto! Kinsa ni imong kuyog?” matod ni Ricardo nga masuk-anon.
“Uy, naunsa ka? Buang ka! Wa ko kaila nimo, uy!” sa babaye nga nahingangha. Milingi sa iyang kuyog. “Hon, naunsa ni siya?”
Giagbayan sa lalaki ang babaye ug miingon, “Bay, si Proserpina ni, akong asawa. Basig nalisoan ka sa utok!” Siga kaayo ang mga mata sa lalaki nga mitutok kang Ricardo.
Giduol sila sa sekyu nga diha sa ilang duol ug gihusay.
Dihang nahiuli na si Ricardo sa ilang balay milingkod siya sa sopa sa sala ug naghinuktok. Migawas gikan sa kusina si Minerva nga nagsul-ob og ‘sleeveless’ nga T-shirt ug skinny jeans.
“Cardo, ready na ang panihapon. Pag-ilis una. Si Ellen tua sa iyang kuwarto natulog na,” ni Minerva.
Mitindog si Ricardo ug migakos sa iyang asawa. “Erva, I’m very sorry sa nahitabo ganihang buntag. Wa diay ka magluib nako. Nasuta ko kini ganiha didto sa CT Mall. Kamay-ong mo ang babaye nga naa sa litrato. Mora siyag imong kaluha.”
“Mao ba? Apan usbon ko. Tiunay ug wagas ang gugma ko kanimo,” ni Minerva.
Hugot nga gigakos ni Ricardo si Minerva ug gipasagdan nila nga magtapot ang ilang mga ngabil. (Kataposan)