CHITO E. GERMINO
Paknaan, Mandaue City, Cebu
GABII sa bisperas sa pista sa baryo Quntolimbo. Makapamayle karon si Roger. Purser siya sa M/V Morning Star nga nidunggo sa pantalan sa dakbayan. Ugma pa sa alas siyete sa gabii molawig ang barko balik sa Manila. Nalipay ang mga ig-agaw ni Roger nga maoy iyang barkada: sila Gaspar, Eddie, Bebot, Ponso, Dave ug Danny. Kay kon ikainom nila si Roger ‘sky is the limit’ sa beer ug sumsuman. Pero, unya na sila mag-inom kon lawom na ang gabii inig-undang na sa bayle sa baskebolan nga gihimong baylehan. Hubgon una ni Roger ang iyang kaugalingon sa kahumot sa mga dalagang nga iyang maggakos sa baylehan.
Alas utso-imedya na sa gabii. Nanagbarog na sa gawas sa temporaryong koral sa baylehan ang tibuok barkada uban sa mga ulitawong silingan. Nanglingkod na ang mga dalaga sa baryo nga nagpadayag sa ilang kaanyag. Diha sila Aida, Odit, Dory, Lilia, Suzette, Rapunzel, Stella, Waning, Gloria, Liza ug Rose.
Tungod sa kaanyag sa mga dalagang silingan ni Roger. Nakaingon siya nga kon mahimo pa lang, lumpungon niyag panguyab tanan. Apan dakong balisong kay si Rose ang labing matahom sa tanan, ug si Roger way bisan gamay nga kaibog sa dalaga. Hinunoa, may hilom siyang pagdumot sa dalaga, bisan og karon mipakita kinig dakong gusto kaniya.
“Gaw, wa ka bay namatikdan kang Rose?” ni Gaspar nga kusinero sa karenderiya sa inahan ni Roger. “Ngano man diay, Gaw?” ni Roger.
“Sigeg lingi diri sa atong gibarugan. Morag gustong magkatinan-away mo ug magpahiyumay,”ni Gaspar. “Imo ra nang hunahuna, Gaw,” ni Roger.
“Dali dang ilhon ang babayeng may gusto. Kon naa siya sa tindahan ni mama mo, magsigeg pangutana nako mahitungod nimo. May uyab ka na ba? Asa imong biyahe? Anus-a modunggo balik sa Cebu? Intresado kaayo nimo,” ni Gaspar.
“Pasensiya siya. Wa man koy interes niya,” ni Roger.
Naalegre ang baylehan dihang mianunsiyo na ang MC nga magsugod na ang bayle. Gipatugtog sa operator ang ‘amplifier’ og sunod-sunod nga mga ‘sweet music.’ Wa pay usa ka oras nasubli na ni Roger pag-bayle ang napulo ka dalaga. Si Rose nga natung-an sa duha ka dalaga, gilabay-labayan lang niya. Mopahiyom usahay niyaa si Rose nga magminghoy.
“Unsa man gyoy wa nimo gustohi kang Rose? Gwapa. Seksi. Buotan. Maayog trabaho. Bright. Bookkeeper. Luya-luya ka, basig unhan kag foreigner. Daghan ra bang langyaw nga mamisita ana niya,” ni Gaspar.
“Wa diay ka kabantay nga tomboy na siya?” ni Roger.
“Ha? Unsay tomboy?” nga nakurat sa nadungog.
“Klasmeyt mi sa Grade 2. Mas dako ug mas taas siya kay kanako adtong panahona. Pag-uso sa ‘pres-pases’ kanunay kong bun-og niya. Kon magkaabot mi suntukon niya akong paa ug abaga Dungan sap ag-ingon, ‘pres-pases!’” ni Roger.
“Ah, nagdumot diay ka niya. Mga bata pa man mo adto. Na-influence lang siya sa upat niya ka maguwang lalaki. Tomboy sa bata pa, pero karong dalaga na, mahinhin na kaayo!” ni Gaspar. “First impression is lasting. Tomboy akong tan-aw niya,” ni Roger.
“Bahala ka. Basig magmahay ka kon maunhan sa ubang ulitawo!” ni Gaspar.
Dihang nag-bayle na si Roger ug si Gloria, miingon si Gloria, “Ni-reklamo baya si Rose, nganong di kuno ka making-bayle niya?” Mitubag nga namasangil si Roger, “Wa ko kauyon sa iyang pahumot.”
Migawas si Rose sa baylehan. Miduol si Roger. “Unsa may paborito nimong perfume?” ni Rose nga mitan-aw kang Roger. “Kanang sama kahumot sa ilang-ilang,” ni Roger.
“Pauli sa ko. Mag-ilis kog sinina ug pahumot. Igbalik nako, di pa gani ka mobayle nako, sumbagon gyud tika!” ni Rose nga mitalikod dayon.
Dihang nahibalik si Rose sa baylehan siya na ang kanunay nga gisayaw ni Roger. Nahimuot si Gaspar nga nagtan-aw sa duha. Nakombinsir da si Roger nga dili tomboy si Rose. (KATAPUSAN)