FREDRICK F. GELBOLINGO
121 Prenza, Argao, Cebu
SA korte ni Huwes Hukman gibista ang kaso nga pagpanglugos batok kang Boy Yakman.
“Gusto kong siluta’g kamatatyon nang tawhana!” milanog ang singgit ni Don Bungoton human angkuna tanan sa ilang ‘boy’ ang salaod nga gisumbong nila batok niini nga mao ang paglugos niini sa tulo ka anak babaye ni Don Bungoton. Mga guwapa ug mga seksi ang mga anak ni Don Bungoton. Ang tulo ka babaye mabdos na’g tag-walo ka buwan.
“Pagka tampalasan! Pagka way utang kabubut-on ning tawhana! Gisagop nako! Gipapuyo sa akong balay! Gi-bistehan! Gipalamoy! La’a diayg tumoy! Nagtuo kong buotan siya kay batan-on, guwapo ug hilumon! Unya, ang akong mga anak iya lang diay gipanghuong! Kon wa pa ko maulii sa akong pagka macho, kitkiton ko gyud nang iyang tubo, morag sugarcane!” Naglungot-lungot ang dughan ni Don Bungoton.
“Di kana tinuod, Sir! Wa ko na buhata, Nyor Don! Maluoy ka, ayaw tawon ko pasiluti’g death sentence... life imprisonment lang! Hu-hu-hu!” mingaab si Boy Yakman nga nagpangurog sa kahadlok. Tiaw moy hiktan kunog pisi ang iyang liog samtang ipaubos sa lethal injection nga maglingkod sa silya elektrika. Di ba mokurog imong itlog ana?
“Buhii ko! Buang! Makahubo ko, uy. Wa koy bakos!” ni Don Bungoton nga mituklod kang Boy Yakman nga miluhod paggakos sa iyang hawakan. Natikay-ang si Boy Yakman, apan dali nga nakabarog dayon.
“Maluoy ka, Sir Don Bungoton, ayaw intawon ko’g pasiluti sa kamatayon!” hangyo-lubo ni Boy Yakman nga mihupo sa tiilan ni Don Bungoton. Ang sapatos ni Don Bungoton gipasinaw ni Boy Yakman, gitrapuhan sa sinina nga iyang gisul-ob.
Gibati ni Don Bungoton nga mora siya’g si Santo Papa.
“Ganina, kalma ka rang miangkon sa sala nga imong nabuhat. Unya karon, mora ka’g peste-inatay nga mohilak-hilak diha aron bakwion nga wa mo sila lugosa!” ni Don Bungoton. Kasikaron siya kang Boy Yakman.
“Giangkon ko to’g tuyo, Sir, aron moubos akong sentensiya. Himan-himan, imo man nuong gimanduan ang Korte nga silutan ko’g kamatayon,” ni Boy Yakman nga nagtibi ang nawong.
“Sige, tugotan tika, sa way pag-uyon. nga wa nimo panamastamasi ang akong mga anak nga triplets. Ngano mang nangaburos man sila? Aber, unsay imong itubag?” ni Don Bungoton nga mikupot sa suwang ni Boy Yakman. Gipahangad ug gisigaan sa mata ug gihan-ag sukmag.
“Ang-ang! Ako may ilang gipanamastamasan, Sir!” pintok nga namulon si Boy Yakman.
“Unsa? Masaridon tika rong buanga ka! Yaaah!” Kon wa pa mapugngi si Don Bungoton sa iyang abogado nga morag si Bouncer nga among iro, pangag ta to si Boy Yakman.
“Tinuod ba iyang gisulti, mga anak?” ni Don Bungoton ngadto sa iyang mga anak.
Minghilak ang iyang mga anak, mingdungo, ug unya nangyango sa ilang mga ulo.
“Tingog mo! Gusto kong makadungog sa inyong tingog!” misinta si Don Bungoton.
“Oo, Papa, amo siyang gipanamastamasan! Kay gihigugma namo siya!” nagdungan pagtubag ang ‘triplets’ nga anak ni Don Bungoton.
Nanglipaghong si Don Bungoton sa iyang nadungog. Nakita niya ang mga tawo sa palibot nga nagdungan og panampong sa ilang mga baba nga nagsud-ong kaniya sa kalit nga katingala. Nasiklapan niya si Boy Yakman nga nagkidhat-kidhat ug nagngisi-ngisi kaniya, daw nalipay sa naangkon niining kadaugan. Kay naglagot man siya kang Boy Yakman, ang tiil ni Don Bungoton misirit nga morag ‘jet’ nga miduol kang Boy Yakman ug gigunitan ang ubos niini.
“Tabang mga tsippp!” singgit ni Boy Yakman ngadto sa mga pulis. “Akong ots... gikumot ni Don Bungoton! Bayot!” Miping-it siya sa kasakit.
Wa makapugong si Huwes Hukman, miagik-ik siya. Mibaik-ik pod ang mga pulis ug ang nanambong sa bista. (KATAPUSAN)