ALCEA MANINGO
Cangyan, Carmen, Cebu
NAGPING-IT ang nawong ni Butch samtang nagkapyot luyo sa dyip pasaheroan. Konduktor siya ning sakyanan. Mipiyong siya. Mikulima. Daw napuling og abog. Ang iyang walang kamot nagkupot sa gunitanan dapit sa atop sa sakyanan. Ang tuo niyang kamot may pinilo nga mga papel de banko nga gisup-it taliwala sa mga tudlo sa iyang kinumo. Gipalutaw niya karong buntaga, alas siyete ang takna, nga iya pang gihunahuna ang tubag sa pangutana sa usa ka pasahero. Puno sa mga pasahero ang dyip gikan sa Tintay Jeep Terminal sa Talamban. Diha pa sila sa 'skywalk' sa Talamban.
"Pilay plete sa Grand Convention, Dong?" matod ganiha sa lalaking hamtong nga naglingkod sa tuong laray sa lingkuranan didto sa tumoy. Desente og hitsura ang tawo. Tingali singkuwentahon na ang panuigon ug kinatiguwangan sa mga pasahero. Hapit tanang mga pasahero karong buntaga sa Miyerkules pulos estudyante. Ang nangutana nagagunit og Reader's Digest nga libro nga nag-ulohan og 'Anatomy of Motive' sinulat ni John Douglas ug usa ka 'brown envelope.'
Wala lang gyod tubaga ni Butch ang pasahero nga mitutok kaniya matag karon ug unya. Gipakunot na sab ni Butch ang iyang agtang. Nauyog ang iyang ariyos sa tuo niyang dunggan. Mora siyag mas tiguwang tan-awon sa iyang edad nga disi-siyete; pag-umangkon siya sa drayber nga si Dante.
"Pila bitaw plete, Dong?" misukot pag-usab ang pasahero pag-abot nila sa Country Mall. Wala lang gyud una tubaga ni Butch ang tawo. Kay di siya gustong may laing makadungog inigtubag niya. "Di man god ko suheto sa pletihan, kay panagsa ra man ko mosakay og dyip. Duna lay problema akong sakyanan. Tua sa talyer."
"Maayo bitaw nang di ka suheto kay makabungat kog mas dako nga pletihan, Way dag-anan ang di suheto kon bungatan og di mao," ni Butch sa iyang hunahuna. Nagpahiyom siyag pino nga nagpasiklap sa pasahero. Kinse pesos ang gilaraw niya nga ibungat, bisag nuybe pesos lang ang tinuod nga plete.
Nakamatikod ang pasahero nga diha na sila sa 'flyover' sa San Jose dela MontaƱa, sa Juan Luna nga karsada. Inig kanaog dinhi, duol na lang kaayo ang Grand Convention Center.
"Pila may plete sa Ayala?" matod sa pasahero nga nakamatikod nga nagdikidiki si Butch sa pagtubag.
Sa maong pangutana dili na gyod makalangan si Butch sa iyang tubag, kay daghang pasahero ang suheto. "Diyes!" ni Butch.
Mikuot ang pasahero sa iyang relos. Mihatag og duha ka biyugol (coin) nga tag singko pesos ngadto kang Butch.
"Duol ra man sa Ayala ang Grand Convention, pareho ra nag plete," sa pasahero.
Wa mosukli si Butch. Nakaginansiya siyag peso. Apan napakyas siya sa iyang gilaraw nga makaginansiya og sayis pesos. Nalipay pod hinuon siya nga wa mahinayon ang iyang laraw, kay sa pagkanaog sa pasahero gisugat kinig mga opisyal sa LTO. Dako diay'g ranggo ang tawo sa LTO ug duna silay seminar sa Grand Convention Center. Nakapanakla si Butch. Unsa kahay mahitabo kon nahinayon pa siya sa iyang pagpangilad? Gipangilugan siya nga naghunahuna kon unsa kahay mahitabo kaniya.
(KATAPUSAN)