TANA, Dan, kay hapit na alas kwatro. Mag-abot tang magduduwa sa balay ni ‘coach’ alang sa gihan-ay niyang opensa ug depensa sa atong kampyunatong dula karong gabii,” agda ni Rick sa iyang amigo nga naghukdong samtang galingkod sa hagdanan sa ilang balay.
“Di ko kaadto, Bay. Galabad ning akong ulo,” ni Dany nga miyahat kang Rick.
“Uy, dili na mahimo, Bay! Ikaw goy sinaligan sa atong ‘team’. Nitumar na kag tambal, Bay?” ni Rick nga nabalaka.
“Bahin ning Jenny, Bay,” ni Dany. “Aw, labad diay nas uyab? Ayaw palabig seryos ana, Bay, kay makadaot na sa imong abilidad sa basketbol,” ni Rick nga nagkatawang mipikpik sa abaga ni Dany.
“Dili na ko paduwaon ug basketbol ni Jenny, Bay. Og mosupak ko buwagan ko niya!” ni Dany nga mihapak sa bungbong. Labihang kuganga ni Rick sa iyang nadungog.
“Unya, Bay, nisugot lang sad ka?” ni Rick nga mikunot ang agtang nga nagtan-aw sa iyang amigo.
“Hibawo bitaw kas akong sakripisyo ug pagbati kang Jenny,” ni Dany nga nanghupaw.
“Pero, Bay, basin baya og mapareho kas akong silingan nga labihang gugmaha niya sa iyang uyab. Apan dihang naminyo sila, siya na ang manglaba, mangutaw, ug mangluto, samtang ang iyang asawa manulong og madyong sa among silingan. Mao nay gitawag sa atong katigulangan nga ‘ander de saya.’” ni Rick nga miagbay kang Dany.
Taudtaod nga kahilom mihari tali nilang duha. Unya kalit giwakli ni Dany ang kamot ni Rick ug misutoy pagsaka sa ilang balay. Nahimut-okan si Rick kay basig na-insultohan niya si Dany sa kahimtang niini karon.
Paglabay sa pipila ka gutlo migawas si Dany nga nag-ilis na og T-shirt ug haslag na ang panagway.
“Tana, Bay Rick!” madasigong sangpit ni Dany sa iyang amigo nga misiga ang mga mata kay dili makatuong nahigmata si Dany sa mubong sugilanon nga iyang gipaambit ngadto niini.
ALAS TRES sa hapon pagka sunod adlaw nagtapok ang mga miyembro sa ‘team’ nilang Dany sa ilang kasagarang abutanan matag adlaw ilawom sa dakong punoan sa kaymito nga giliyukan sa lingkuranan ug nahimutang sa tugkaran sa balay ni Greg Basalo, ang luyo-luyong ‘coach’ sa ‘team.’
Napuno si Dany sa pagdayeg sa iyang mga kauban tungod sa maayo kaayo nilang pagkaduwa nga nakapahimo kaniyang ‘most valuable player’ (MVP). Nasakmit sab sa ilang ‘team’ ang kampyunato batok sa team RAMS.
“Abi ninyo, Bay, dili na unta ni siya moduwa kon wa pa mahigmata sa akong gisugid kaniya kabahin sa gidangatan sa akong silingan nga nahimong ander de saya tungod sa hilabihanay nga gugma!” ni Rick nga mitan-aw kang Dany nga nagduko.
“Nganong dili na man unta siya modula, Bay Rick?” ni Ponciano ‘Pons’ Abella ang ‘team scorer’.
“Gidid-an na siya pagdula og basketbol ni Jenny!” ni Rick nga pinabundak ang tingog.
“Unsaaa?!” Hapit magkadungan ang grupo pagsiyaok.
“Og wa pa mahigmata si Dany, Bay Rick, dili kay ander de saya lang siya, kundili ma-ander de bunal pa gyud siya ni Jenny,” singgaak ni Koking nga ‘forward’ sa ‘team’ nga nakamugnag sipang suliyaw sa grupo.
Apan kalit nahilom ang nanagtapok dihang miabot si Lorna nga misangpit kang Dany nga mapahiyumon.
“Dan, gisugo ko ni Jenny nga paadtuon kas ilang balay,” ni Lorna nga mikidhat kang Dany.
“Uy, Lorna, ingna ang nagsugo nimo nga papangitaa siyag uyab nga ma-ander de saya niya kay ako ober de saya na!” ni Dany nga nagpangusmong mibanghag kang Lorna.
Midahunog ang lanog nga hugyaw ug sipang bahakhak sa gikan sa mga sakop sa ‘basketball team EDABEL.’ (KATAPUSAN)
“