DIDTO sa dakbayan sa Baguio, may ordinansa nga nagdili na sa mga lungsuranon nga mogamit sa ilang gadgets ilabi na sa selpon ug tablet samtang naglakaw sa kadalanan. Ang hinungdan niini nga may nadisgrasya tali sa naggamit sa gadgets ug sa nabiktima niini. May mga lungsuranon nga nagkabunggoay ug nagkalalis ug nagkaaway.
Ang sangputanan may nangaangol ug may nagpinatyanay.
Gilatid usab sa maong ordinansa nga may nabanggaan sa mga sakyanan kay milabang sa dalan nga nagkalingaw sa ilang gadgets. Distractions, matod pa sa ordinansa ang gitumong ug gituyo sa paglusad sa ordinansa sa ilang dakbayan kay may natala na silang mga aksidente tungod sa pagkasabod sa ilang panan-aw nga nagatutok ka nunay sa ilang selpon ug tablet.
Mga trahedya ang ilang natala bahin sa pagpagula sa ordinansa. Apan lahi kining akoa. Nakadasmag akog batan-ong babaye. Pareho kaming naggamit sa among mga selpon. Wala kami masayod nga nagkabanggaay na kami. Natikay-ang kaming duha. Nakabay-an ko ang batan-ong babaye ug ang kamot ko nakahamal sa bus-ok niyang dughan. Hilabihang sukoa niya ug iya kong gisagpa. Ako gyud ang iyang gipakasala.
“So-sri, Miss, wa ko tuyoa."
Apan di siya mamati sa tingog ko. Dugayng nahupas ang iyang kaputong sa nahitabo kanamo. Ang mga tawo nagtinan-away kanamo ug nagkatawa.
Kay nauwaw na ako, mihana ako pagtalikod, apan kalit niyang gibunlot ang kuwelyo sa akong polo shirt. Naumod ko ug nakagakos ako kaniya. Miulbo ang tanang bulkan sa kalibotan. Iyang gilusi ang lawas ko ug kanunay lang akong mahaigking. Wala na ako makapugong.
Gigakos ko siya, hugot gyud, ug giukoban kog halok ang iyang ngabil. Nakuyapan siya sa akong gibuhat.
May pulis nga mitunga. Pulis nga babaye. Gikuwelyohan na usab ako. Gidala kami sa presinto. Naghilak kong nagpangayog pasaylo. Nagluhodluhod pa ako sa ilang atubangan. Apan wala gyod ko papasayloa. Nabalhog ko sa selda sa presinto.
Pinaagi sa selpon ko, mitunga ang mga ginikanan ko. Miduol ang mommy ko sa polis nga babaye, ingon sa nagkumustahay sila, nagbesobeso pa sila. Huwes ang akong inahan sa usa ka korte. Ug ang akong daddy miduol sa babayeng polis, mahinangpon sila sa usag-usa. Bag-o pang miretiro ang daddy ko sa pagkahepe sa polis.
Nahibaloan ko na lang nga gipagula ko sa akong selda. Nagpasalamat ako sa babayeng polis. Usa siya sa mga opisyal sa kapolisan. Kumare siya akong mommy.
Nahibaloan ko ang pinuy-anan sa batan-ong babaye. Siya si Maybelline. Nagkaila kami, nagkasuod ug nagkahigugmaay. Sa pagkatapos sa among pagtuon sa kolehiyo, nagpakasal kami.
Kon hain kami mahapunrta, mopahinumdom si Maybelline nga dili ko gamiton ang selpon ko aron dili ako madisgrasya. (Katapusan)