NAGUOL si Josilyn kay karong adlawa wala siya magdahom nga magbuwag ang iyang Papa Luis ug Mama Lina.
Ang sinugdanan sa ilang away mao da gyud ang pangabubho sa iyang amahan, kay usa ka hapon niana naabtan niini ang iyang inahan nga nakig-estoryahay sa kanhing hinigugma didto daplin sa sapa.
Mibukal ang dugo ni Luis apan iya lang gipugngan ang iyang kasuko. Mao nga dihang didto na si Lina sa ilang balay pagka gabii gipadayag dayon ni Luis ang kasakit sa iyang dughan ngadto sa guwapa niyang asawa.
“Nagselos ka ba? Sayod na bitaw ka nga si Arnold akong uyab kaniadto, apan dugay nan ga wala na mi. Dihang naminyo na ta wala na mi relasyon, uy!
Gawas pa, may asawa na sab siya, si Merced!” mitaas ang tingog ni Lina nga naglagot ning pagpangabubho karon sa iyang bana.
“Lina, minyo na ka! Maglikay ka na sa pakighinabi sa laing tawo, labi na og lalake! Wa kay delikadesa! Wa ka kahibawo kon unsay hustong moralidad!” milanog sab ang tingog ni Luis.
Ang pagtinubagay nilag hait nga mga pulong misangko sa ilang panag-away ug sa dili maayong hukom nga magbuwag sila.
Ug ning hitaboa naapektuhan gyud kaayo si Josilyn. Daghan ang mga luha nga nanaligdig sa iyang kaapingan.
“Nganong magbuwag man mo, Papa, Mama?” ni Josilyn nga nagbakho. “Tungod ba lang sa selos? Di na ba gyud ni matabang?”
Wala makatingog sila Luis ug Lina. Misulod si Lina sa ilang kuwarto ug gipanulod ang iyang mga sapot sa maleta kay magbuwag man lagi silang Luis.
Giagda ni Lina si Josilyn sa pagkuyog, apan mibalibad kini ug nagpabilin uban sa iyang amahan.
MILABAY ang pipila ka tuig. Nakahuman na si Josilyn sa iyang kurso sa kolehiyo. May hinigugma na pod siya. Buotan si Renato nga usa ka doktor.
Usa ka sayong buntag nakadawat siyag taho gikan sa paryente sa iyang Mama Lina, nga masakiton si mama niya ug tua sa ospital.
Gisultian niya ang iyang Papa Luis ug milabhag sa nawong niini ang kabalaka. Giduaw nila si Lina sa ospital. Daot na kaayo si Lina nga mipahiyom sa pagkakita niya nilang Josilyn ug Luis.
“Ma, kumusta man ka? Nia mi si Papa aron bisitahon ka. Propesyunal na ko ug lumalarga na paingon sa Amerika. Gusto nakong mag-uli na kamong Papa.
Nagkabuwag mot ungod lang sa selos, nga para nako, natural lang sa magtiayon nga nagkahigugmaay.
Mahal man tika, Ma, bisag talagsa ra tang nagkita!” Ug gihagkan ni Josilyn ang aping ug agtang ni Lina, dayong gawas. Nahibilin si Luis uban kang Lina.
Didto luyo sa pultahan giablihan ni Josilyn og gamay ang sera. Nakita niya si papa niya Luis nga naglingkod sa ngilit sa kama ug nagkupot sa duha ka palad sa iyang Mama Lina.
Misantop sa iyang hunahuna nga anaa pa sa tagsa-tagsa nila ka kasingkasing ang gugma; gugma nga giputol lang sa usa bangis nga garbo.
Sangko sa langit ang kalipay ni Josilyn nga human sa dugayng panahon nagkauli da ang duha ka kasingkasing sa iyang ginikanan. (KATAPUSAN)