Sugilanon: Paukyab sa Pista Senyor
SEMANA na lang sa dili pa ang Pista Senyor ug nahisay-a si James sa siyudad kay miapas sa iyang asawa nga duha ka buwan nang wala na niya igdungog sukad mananghid kaniyang motrabaho sa karenderiya sa iyang iyaan. Tungod sa ilang kalisod sa probinsiya nakahukom si Crista nga mag-pasiyudad. Gitugtan usab niya kay maayo man ang tumong niini. Maayo na lang nga may maka-bangkilya kaniya sa panginabuhi. Usa man lang god si James ka mag-uuma.
Apan milabay na lang ang duha ka buwan wala na siyay balita sa iyang asawa. Bisan teks o tawag sa selpon wala gyud siyay nadawat. Tungod sa kahingawa nakahukom si James pag-apas sa kapikas sa dakbayan kay nakadumdom man siya sa karenderiya nilang Tiya Anita niya sa dalan Magallanes. Buot usab niyang makasuroy ug makatan-aw sa Sinulog kay hapit na man ang Pista Senyor.
Sa iyang pag-abot sa kan-anan sa ilang iyaan, maoy miatubang kaniya ang usa ka batan-ong silbidora.
“Naa ba si Tiya Anita, Inday?” ni James pa. “Iya kong pag-umangkon.”
“Wa ra ba dinhi, Manong. Nangumpra pa sa Carbon,” matod sa babaye. “Ngano man unta, Manong?”
“Magsusi lang unta ko kon naa pa ba dinhi ang akong asawang si Crista.”
“Uy, si Ate Crista diay imong tuyo? Wa na man siya dinhi, Manong. Dugay na siyang mibiya ning karenderiya.”
Huyhoy ang abaga ni James nga mitalikod sa tindahan sa iyang iyaan. Naglibog siya kon asa niya pangitaa si Crista. Nakahunahuna siyang moadto sa Basilika aron mosimba. Mag-ampo siya nga iyang makit-an ang iyang kapikas. Ug samtang naglakaw nakabatyag siyag kagutom. Naghilab ang iyang tiyan busa misulod siya sa usa ka kan-anan sa Manalili.
“Wa bay naglingkod dinhi, Bay?” ni James pa niadtong lalaki nga nag-inusarang nagkaon sa usa ka talad. “Mahimo bang anhi lang ko molingkod?”
Sa pagyanghag kaniya sa tawo nakuratan kini. “Uy, James, ikaw ba kini? Lingkod lang diha kay wa man koy kauban.”
“Uy, ikaw man diay ni Jonas!” nakugang usab si James. “Dugaya na nimong nawala sa ato, uy. Kumusta na man ka?”
“Aw, nia nagdrayb lang tawon og taksi. Ikaw, nahasuroy lagi kas siyudad? Hapit na ra bang Pista Senyor. Motan-aw kag Sinulog?”
“Usa na, Bay, apan ang una gyud nakong tumong mao ang pagpangita sa akong asawa!”
“Mao ba? ‘Nya naa ba kay kasak-an dinhi? Kay kon wala, adto lang una tas amo. Dako-dako man tong among balay sa Labangon.”
“Mag-pension house lang unta ko apan kay mitanyag man ka, aw, adto lang una kos inyo moestar og pipila ka adlaw samtang mangita sa akong asawa.”
“Sige, sakay lang sa gimaneho kong taksi kay mag-uban ta sa balay gikan dinhi aron magkahimamat pod mo sa akong kapuyo.”
Human makabayad sa ilang gikaon, nanakay dayon sila sa taksi ug pag-abot sa balay nilang Jonas sa Labangon gisangpit dayon sa iyang amigo ang kapuyo niini.
“Day Crista, hain man ka? Dali diri kay buot makakita nimo ang akong paisano.”
Nahitalunong si James pagkabati sa ngan nga gisangpit ni Jonas. Wala madugay miguho sa ganghaan ang babaye nga iyang gipangita. Pareho silang wala makatingog sa kahingangha ug igo lang nagtinutukay. (KATAPUSAN)