WALA ba mabali ang imong ginapangayo kanako?” matod sa linalang nga sungayan ug ikogan.
“Wala. Mao ni ang akong gusto. Kuhaa ang akong talento, ang akong kabantog, ang akong kabtangan. Ibalik lang ang akong kalag!” pintok nga namulong si Leroy.
“Wala man nako kuhaa ang imong kalag!” pulong sa sungayan.
“Ilisi ang akong kalag,” ni Leroy.
“Matuman!” sa sungayan.
Ug namugna ang usa ka talagsaong kasabutan tali sa yawa ug ni Leroy. Si Leroy nga kaniadto naligo sa salapi ug kabantog tungod sa iyang kahawod mogitik sa sista. Ug karon nagsubo sa pagkahanaw sa hinigugma niya sa iyang kinabuhi. Lahi ra ang sitwasyon nga magmalampuson sa butang nga ginapangandoy ang mga tawo nga andam nilang ihatag ang ilang mga kalag aron lang makab-ot ang gipangandoy nga mga damgo. Apan si Leroy nga wala naglisod pagkatkat sa bantawan sa kabantog karon gustong manaog.
Hinuon, kinsa bay dili magmahay nga imo lang hikalimtan kanunay ang binuhat nga naghuwat sa imong pagpauli sa balay? Matag gabii siya mag-atang sa sangi sa nagsanga nga dalan kon hain ka na, posible -- unsang adlawa, unsang orasa madunggan ang suwabe nga tingog sa makina ug masaksihan ang pag abot sa imong sinaw ug mahalong sakyanan. Samtang nag-awas ang imong kuwarta, nag-awas usab ang iyang mga kasakit.
Maong si Leroy misalig sa gikaintapan nga nagsangi nga dalan ug nihangyo sa yawang nagpuyo sa kahoy sa mangga. Maoy solusyon nga iyang nahukman: pangayuon og balik ang iyang kalag kon asa man kini mahimutang human sa iyang pagmalampuson sa musika.
Aduna tingaliy nagkuha ug gipulihan ang iyang kalag sa bahandi nga iyang natagamtaman sa kinabuhi. Seguro, sa hunahuna niya, kon mahibalik ang akong kalag, mobalik pod ang akong pinangga. Kon wala pa unta mahitabo ang tanang nangagi. Kon wala pa unta ang tanang mga kontrata, ganti, ug pagtamod. Kon wala lang unta ko mopahawa sa among panimalay, dinhi ning yuta sa among paghinigugmaay. Kon wala pa unta nako pilia ang pagpahawa, tingali nagpuyo ko ning kalibutan sa tumang kamalipayon.
Mao nga karon ania siya dinhi aron makigsabot sa yawa. Usa ka talagsaong kasabutan sa yawa, apan natuman. Ang iyang gipangayo natuman na. Aduna na siyay kalag nga mabati sa iyang lawas. Wala na ang iyang talento, kabantog, ug kabtangan. Wala na ang tanan, apan aduna na siyay kalag nga mobati og kasubo, pagbasol, kaluoy, ug pagmahay. Aduna na siyay kalag nga maoy lintunganay sa kahidlaw sa iyang pinangga nga makahuwat didto sa sangi nga ilang tagbuanan.
Nindot untang paminawon ang huni sa mga kuwerdas sa sista sa pagbating ingon niini. Apan wala na. Kalag na lang ang nagpabilin ug walay nakahibawo kon nipahawa ba gayod kini kaniya bisan sa makausa. (Katapusan)