BATA pa si Emong mahiligon na sa pagpanuwat. Apan walay publikasyon nga mipatik sa iyang mga sinuwat bisan migamit na siya sa upat ka pinulongan sama sa Sugbuanon, Tagalog, Ingles ug Katsila. Demalas gyud ug nakaingon na hinuon siya nga wala siya tugahi sa Diyos nga mahimong magsusulat.
Apan naluya ug nahapla na ba siya sa yuta sa iyang paningkamot? Wala. Mosulat ug mosulat gihapon siya bisan ‘degree holder’ na siya kolehiyo. Kay sa panahon nga mongitngit ang iyang panan-aw sa natad sa panulat, labi pa hinuon siyang mobuylo sa pagpanuwat. Sinako na ang iyang mga sinuwat dihang kap-atan na ang iyang panuigon. Di gyud siya molunga.
Naminyo si Emong ug may mga anak. Kataw-an siya sa iyang asawa nga abogada.
“Hunong na niana, uy! Namuti na ang buhok mo, wa gayuy mipatik sa mga sinuwat mo. Ako gani nga abogada ug maayong mo-iningles, wala man gani mohilig sa pagpanuwat. Focus to your profession as an engineer. Mabantugan ka pa sa imong pagka enhinyero.”
Sakit, sakit kaayo ang gipamulong sa iyang misis nga guwapa ug seksi nga si Lucy. Apan ang ngalan sa iyang asawa nahisama kang Lucifer. Dili siya magpatunto sa komnentaryo sa iyang asawa.
May gikaila ug gikahigala siyang magsusulat kaniadto. Nagkasuod silang duha apan nagpakamatay kining iyang higala. Ulitawong guwang kadtong higala niya ug nag-inusara lang. Mao nga sa kasubo ug kamingaw, makig-deyt kini og inday-hilay ug gikauban niini kadtong usa ka bantugang magsusulat nga Erning Mariposa sa lungsod sa Timbuktot..
Gisugilon kini sa iyang higala nga si Franco Bella. “Mingaw, Brad Emong. Mangita kog tsiks nga magsauysaoy sa dalan Colon sa tungang gabii. Kauban ko kanunay si Erning Mariposa. Kay iyang nahinumdoman ang maong panghitabo, gisulat ni Emong ang halawom nga kamingaw ni Franco Bella ug nganong naghikog kini sulod sa iyang panimalay. Nakaduaw siya sa panimalay sa iyang higala ug iyang hingpit nga gihubit ug gihulagway ang dapit ug ang kabanay niini. Sapian kini ug may mga balay sa dakbayan nga gipaabangan.
Miapil siya sa usa ka bangga sa sinulatay nga gipasiugdahan sa usa ka kapunongan sa mga magsusulat sa Kabisay-an ug Mindanao. Ug wala niya damha nga midaog siya ug siya ang nakakuha sa unang ganti! Ingon sa dili makatuo ang iyang asawa sa dungog nga naangkon karon sa iyang bana sa natad sa katitikan. (KATAPUSAN)